news
English

ٹی20 رینکنگ: بابراعظم سے تیسری پوزیشن بھی چھن گئی

 دبئی: انٹرنیشنل کرکٹ کونسل (آئی سی سی) نے ٹی20 کی نئی رینکنگ جاری کردی۔

ٹی20 رینکنگ: بابراعظم سے تیسری پوزیشن بھی چھن گئی

آئی سی سی کی نئی جاری کردہ رینکنگ کے مطابق قومی ٹیم کے کپتان بابراعظم ایک درجے تنزلی کے بعد چوتھے نمبر پر آگئے ہیں جبکہ بھارت کے سوریا کمار یادیو نے پہلی پوزیشن پر قبضہ برقرار رکھا ہوا ہے۔

قومی ٹیم کے وکٹ کیپر بیٹر محمد رضوان بدستور دوسرے نمبر پر براجمان ہیں جبکہ کیوی بلے باز ڈیون کانوے نے بابراعظم سے تیسری پوزیشن چھین لی ہے۔

انگلش ٹیم کو ٹی20 میں عالمی چیمپیئن بنوانے والے کپتان جوز بٹلر کی رینکنگ میں ایک درجے بہتری آئی ہے جس کے بعد وہ 11 ویں نمبر آگئے ہیں۔

اسی طرح بالرز کی رینکنگ میں قومی ٹیم کا کوئی بھی بالر ٹاپ 10 میں شامل نہیں، سری لنکا کے ونندو ہسارنگا کا پہلا نمبر ہے جبکہ افغان اسپنر راشد خان دوسری پوزیشن پر قابض ہیں۔

حارث رؤف، شاہین آفریدی اور شاداب خان کی رینکنگ میں ایک ایک درجے بہتری آئی ہے، تینوں کھلاڑی بالترتیب 16، 17 اور 18 ویں نمبر پر براجمان ہیں۔