ٹی20 ورلڈکپ: افغانستان نے یک طرفہ مقابلے کے بعد یوگنڈا کو باآسانی ہرادیا  

آئی سی سی مینز ٹی20 ورلڈکپ 2024 کے پانچویں میچ میں یک طرفہ مقابلے کے بعد افغانستان نے یوگنڈا کو با آسانی شکست دے دی۔ گیانا کے پروویڈینس اسٹیڈیم میں کھیلے گئے مینز ٹی20 ورلڈکپ کے پانچویں میچ میں افغانستان کی جانب سے دیے گئے 184 رنز کے ہدف کے تعاقب میں یوگنڈا کی پوری ٹیم 16ویں اوور میں صرف 58 رنز کے مجموعی اسکور پر پویلین لوٹ گئی۔ 
اننگز کے آغاز سے ہی یوگنڈا کی بیٹنگ لائن مشکلات کا شکار رہی اور محض 58 رنز پر پوری ٹیم پویلین لوٹ گئی، اوپنر رونک پٹیل 4 رنز بناسکے جبکہ روجر مکاسا بغیر کوئی رن اسکور کیے پویلین لوٹ گئے، سیمن سیسازی 4 اور دنیش نکرانی صرف 6 رنز بنا کر آؤٹ ہوئے جب کہ الپیش رمجانی بھی کوئی رن اسکور نہ کرسکے اور کیچ آؤٹ ہو گئے۔ بیٹر ریاضت علی شاہ اور کپتان برائن اوبویا بھی وکٹ پر زیادہ دیر نہ رک سکے، ریاضت علی نے 11 رنز بنائے جبکہ کپتان برائن کوئی رن اسکور نہ کرسکے۔ روبن سن اوبویا نے مزاحمت کرتے ہوئے 14 رنز بنائے اور آؤٹ ہو گئے جب کہ بلال حسن 8 رنز بناپائے اور ہینری سین یونڈو کوئی رن نہ بناسکے تاہم کوسمس کیووٹا 2 رنز بنا کر ناٹ آؤٹ رہے۔ 
افغانستان کی جانب سے پیسر فضل الحق فاروقی نے بہترین بولنگ کا مظاہرہ کرتے ہوئے 4 اوورز میں صرف 9 رنز دے کر 5 وکٹیں اپنے نام کیں اور میچ کے بہترین بولر قرار پائے، مجیب الرحمان 1 اور نوین الحق 2 وکٹیں لینے میں کامیاب ہوئے۔  
قبل ازیں یوگنڈا نے افغانستان کے خلاف ٹاس جیت کر پہلے فیلڈنگ کا فیصلہ کیا۔ یوگنڈا کے خلاف پہلے بیٹنگ کرتے ہوئے افغانستان نے مقررہ 20 اوورز میں 5 وکٹوں کے نقصان پر 183 رنز بنائے۔ افغانستان کے اوپنر رحمت اللہ گرباز اور ابراہیم زردان نے ٹیم کے لیے 154 رنز کی زبردست پارٹنر شپ بنا کر ٹیم کو شاندار آغاز فراہم کیا، ابراہیم زردان نے 1 چھکے اور 9 چوکوں کی مدد سے 46 گیندوں پر 70 رنز اسکور کیے۔ 156 کے مجموعی اسکور پر رحمت اللہ گرباز بھی پویلین لوٹے، انہوں نے 45 گیندوں پر 4 چھکوں اور 4 چوکوں کی مدد سے 76 رنز بنائے۔ افغانستان کی جانب سے نجیب اللہ زردان صرف 2 رنز اسکور کر پائے جبکہ گلبدین نائب 4 اور عظمت اللہ اورامزئی 5 رنز بنا کر آؤٹ ہوئے۔ محمد نبی 16 گیندوں پر 14 رنز اور کپتان راشد خان ایک گیند پر دو رنز بنا کر کریز پر موجود رہے۔ 
یوگنڈا کی جانب سے برائن مسابا اور کوسمس کیووٹا نے 2-2 وکٹیں اپنے نام کیں جبکہ الپیش رامجانی ایک وکٹ لے سکے۔ 
افغانستان کا اسکواڈ: 
افغانستان کی جانب سے کپتان راشد خان، وکٹ کیپر رحمان اللہ گرباز، ابراہیم زردان، نجیب اللہ زردان، محمد نبی، گلبدین نائب، عظمت اللہ عمر زئی، کریم جنت، مجیب الرحمان، نوین الحق، فضل الحق فاروقی پلیئنگ الیون کا حصہ ہیں۔ 
یوگنڈا کا اسکواڈ: 
یوگنڈا کی ٹیم میں کپتان برائن مسابا، رونک پٹیل، کیپر سیمن سیسازی، روجر مکاسا، ریاضت علی شاہ، دنیش نکرانی، الپیش رامجانی، روبن سن اوبویا، بلال حسن، کوسمس کیئووٹا، اور ہینری سین یونڈو شامل ہیں۔