ٹی20 ورلڈکپ: لنکن ٹائیگرز نے افغانستان کو ہرا کر ایونٹ سے باہر کردیا

ٹی 20 ورلڈ کپ کے سپر 12 مرحلے میں سری لنکا نے افغانستان کو 6 وکٹوں سے شکست دے دی، جس کے بعد افغانستان ورلڈ کپ سے باہر ہو گیا ہے۔ 

برسبین میں کھیلے گئے میچ میں افغانستان کے کپتان محمد نبی نے ٹاس جیت کر پہلے بیٹنگ کا فیصلہ کیا۔ پہلے بیٹنگ کرتے ہوئے افغانستان نے مقررہ اوورز میں 8 وکٹوں کے نقصان پر 144 رنز بنائے،  افغان اوپنرز نے 42 رنز کا آغاز فراہم کیا، افغان بیٹر رحمان اللہ گرباز اور عثمان غنی بالترتیب 28 اور 27 رنز بنانے میں کامیاب ہوئے۔

دیگر کھلاڑیوں میں ابراہیم زدران 22، نجیب اللہ زدران 18، گلبدین نائب 12، کپتان محمد نبی 13، راشد خان 9 اور عظمت اللہ عمرزئی نے 3 رنز اسکور کیے۔

سری لنکا کی طرف سے وینیندو ہسارنگا نے 3 کھلاڑیوں کو آؤٹ کیا جبکہ لاہیرو کمارا نے2 ، مہیش تھیکشنا اور دھننجیا ڈی سلوا نے ایک، ایک وکٹ حاصل کی۔

سری لنکا نے 145 رنز کا ہدف 18 اعشاریہ 3 اوورز میں 4 وکٹوں کے نقصان پر حاصل کر لیا۔ہدف کے تعاقب میں لنکن ٹائیگرز نے محتاط انداز میں بیٹنگ کا مظاہرہ کیا، اوپنر پاتھون نسانکا 10 اور کوشل مینڈس 15 رنز بناکر جلد وکٹیں گنوا بیٹھے تاہم دھننجایا ڈی سلوا 66 رنز کی ناقابل شکست اننگز کھیل کر ٹیم کی فتح میں اہم کردار ادا کیا۔

دیگر کھلاڑیوں میں بھانوکا راجا پاکسے 18 اور چارتھ اسالنکا 19 رنز بناکر نمایاں رہے، افغان بالرز کی جانب سے راشد خان نے 2 جبکہ مجیب الرحمان نے ایک وکٹ حاصل کی۔

 ٹی20 ورلڈکپ میں سپر 12 مرحلے کے 20 ویں میچ میں سری لنکا نے افغانستان کو 6 وکٹوں سے شکست دیکر گروپ اے میں پوائنٹس ٹیبل کو مزید دلچسپ بنادیا ہے۔

افغانستان اور سری لنکا کی ٹیمیں ایونٹ میں اب تک 3، 3 میچز کھیل چکی ہیں، سری لنکا نے ایک میچ میں کامیابی حاصل کی ہے جبکہ دو میچز میں اسے شکست کا سامنا کرنا پڑا ہے۔

دوسری جانب افغانستان کے دو میچز بارش کے نذر ہوئے اور ایک میچ میں انگلینڈ کے ہاتھوں شکست ہوئی تھی۔

دن کا دوسرا میچ پاکستانی وقت کے مطابق 1 بجے شروع ہوگا جو نیوزی لینڈ اور انگلینڈ کے درمیان ہے۔

انگلینڈ کو اگر سیمی فائنل کی دوڑ میں رہنا ہے تو اس میچ میں لازمی فتح حاصل کرنا ہو گی۔