برسبین: ٹی20ورلڈکپ، سپر 12 مرحلے کےاہم میچ میں انگلینڈ نے نیوزی لینڈ کو ہرادیا

برسبین میں کھیلے گئے میچ میں انگلینڈ نے نیوزی لینڈ کے خلاف ٹاس جیت کر پہلے بیٹنگ کرنے کا فیصلہ کیا جو درست ثابت ہوا، کپتان جوز بٹلر نے کیوی بالرز کو آڑے ہاتھوں لیتے ہوئے 47 گیندوں پر 7 چوکوں اور 2 چھکوں کی مدد سے 73 رنز اسکور کیے۔

انگلینڈ نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 179 رنز اسکور کیے، اوپنر ایلکس ہیلز نے 52 رنز کی جارحانہ اننگز کھیلی، ان کے علاوہ لیام لیونگسٹن 20، معین علی 5، ہری بروک 7، بین اسٹوکس 8 رنز بناکر نمایاں رہے۔

نیوزی لینڈ کی جانب سے لوکی فرگوسن نے 2 جبکہ مچل سیٹنر، ٹم ساؤتھی اور ایش سودھی نے ایک ایک وکٹ حاصل کی۔

ہدف کے تعاقب میں نیوزی لینڈ کا آغاز اچھا نہ تھا، اوپنرز ڈیون کانوے 16 اور فن ایلن 3 رنز بناکر جلد وکٹیں گنوا بیٹھے تاہم گلین فلپس نے 36 گیندوں پر 62 رنز کی مزاحمتی اننگز کھیلی۔ ان کے علاوہ دیگر کھلاڑیوں میں کپتان کین ولیمسن 40، جمی نیشم 6، ڈیرل مچل 3، مچل سینٹر 16 رنز بناکر نمایاں رہے۔

انگلینڈ کی جانب سے کرس ووکس اور سیم کرن نے 2، 2 جبکہ مارک ووڈ اور بین اسٹوکس نے ایک ایک وکٹ حاصل کی۔

واضح رہے کہ نیوزی لینڈ کو میگا ایونٹ میں پہلی شکست ہوئی ہے جبکہ گروپ اے انگلینڈ کی جیت کے بعد پوائٹنس ٹیبل کی صورتحال کچھ اس طرح ہے کہ نیوزی لینڈ پانچ پوائنٹس کے ساتھ ٹاپ پر ہے جبکہ انگلینڈ پانچ پوائنٹس کے ساتھ دوسرے اور آسٹریلیا پانچ پوائنٹس کے ساتھ تیسرے نمبر پر ہے۔ 

سری لنکا کے چار پوائنٹس ہیں، جبکہ آئرلیںڈ کے تین اور افغانستان کے دو پوائنٹس ہیں۔