آسٹریلیا کا دورہ پاکستان خوش آئند ہے، سابق کرکٹرز

پاکستان کرکٹ بورڈ (پی سی بی) کے پوڈ کاسٹ میں 3سابق کپتانوں وسیم اکرم، ایلن بارڈر اورمائیکل ایتھرٹن نے آسٹریلیوی کرکٹ ٹیم کے دورہ پاکستان کوخوش آئند اوراہم پیشرفت قراردے دیا۔ پاکستان کے سابق کپتان وسیم اکرم کا کہنا تھا کہ آسٹریلیا کے خلاف میچز میں بیٹنگ میں بابراعظم اورمحمد رضوان اوربولنگ میں شاہین شاہ آفریدی پاکستان کے ہتھیارہوں گے۔

وسیم اکرم کا مزید کہنا تھا کہ آسٹریلیا کے خلاف سیریز ہمارے کھلاڑیوں کے اعتماد میں اضافہ کرے گی اور پاکستان کرکٹ کے مجموعی منظرنامے پرمثبت اثرات مرتب کرے گی۔ آسٹریلیا کا 24 سال بعد پاکستان کا دورہ کرنا پی سی بی کا بڑا کارنامہ ہے۔

آسٹریلیا کے سابق کپتان ایلن بارڈرنے کہا کہ بابراعظم سے بہت متاثر ہوں۔ ان کی تکنیک اچھی ہے۔ بابراعظم کی قیادت میں پاکستان کی ٹیم ایک یونٹ بن کرابھر رہی ہے۔ پاکستان کی ٹیم آسٹریلیا کوشکست دینے کی مکمل صلاحیت رکھتی ہے۔

ان کے مطابق یہ سیریز دونوں ٹیموں کے کھلاڑیوں کے لئے نام بنانے کا سنہرا موقع ہے۔ آسٹریلوی ٹیم پاکستان کوپاکستان میں ہرا کرتاریخی دورے کویادگاربنا سکتی ہے۔

انگلینڈ کے سابق کپتان مائیکل ایتھرٹن کا کہنا تھا کہ آسٹریلیا کا اپنی بہترین ٹیم پاکستان بھیجنا بڑی خوشخبری ہے۔ ماضی میں پاکستان کا اپنی ہوم کرکٹ متحدہ عرب امارات میں کھیلنا لازمی ضرور تھا مگر یہ کوئی پائیدار حل نہیں تھا۔ امید یے کہ شائقین کو اچھی کرکٹ دیکھنے کو ملے گی۔