تیسرا ون ڈے: پاکستان نے نیوزی لینڈ کوجیت کے لیے281 رنز کا ہدف دے دیا

کراچی کے نیشنل اسٹیڈیم میں کھیلے جانے والے تیسرے ایک روزہ میچ میں قومی ٹیم نے نیوزی لینڈ کو 281 رنز کا ہدف دے دیا۔ دونوں ٹیموں کے دوران سیریز ابھی ایک ایک سے برابر ہے۔

پاکستانی بیٹنگ لائن کو ابتدا میں پریشانی کا سامنا کرنا پڑا، اوپنر شان مسعود صفر جبکہ کپتان بابراعظم 4 رنزبناکر پویلین لوٹ گئے، 21 کے مجموعی اسکور پر دو وکٹیں گرنے کے بعد فخز زمان اور محمد رضوان نے 153 رنز کی پارنٹرشپ قائم کی تاہم رضوان 77 رنز بناکر وکٹ گنوابیٹھے، فخرزمان 101 رنز بنا کر رن آؤٹ ہوئے جکہ حارث سہیل بھی 22 رنز بنا کر رن آؤٹ ہوگئے۔

آغا سلمان نے 45 رنز کی اہم اننگز کھیلی تاہم وہ نصف سنچری مکمل نہ کرسکے اور گیند کو باؤنڈری سے باہر پھینکنے کی کوشش میں کیچ آؤٹ ہوگئے۔

نیوزی لینڈ کی جانب سے مچل بریسویل، اش سودھی اور لوکی فرگوسن نے ایک ایک وکٹ حاصل کی۔

قبل ازیں قومی ٹیم کے کپتان بابراعظم نے ٹاس جیت کر پہلے بیٹنگ کرنے کا فیصلہ کیا، انہوں نے کہا کہ کوشش ہوگی فتح سمیٹ کر سیریز اپنے نام کریں۔قومی ٹیم میں دو تبدیلیاں کی گئی تھیں، انجری کے باعث امام الحق کی جگہ نائب کپتان شان مسعود جبکہ نسیم شاہ کی جگہ محمد حسنین کو موقع دیا گیا ہے۔

اس موقع پر کیوی کپتان کین ولیمسن نے کہا کہ ٹاس جیتتے تو پہلے بیٹنگ کرتے تاہم کوشش ہوگی پاکستان کو جلد آؤٹ کر کے میچ کے ساتھ سیریز میں کامیابی سمیٹیں۔

پاکستان کا اسکواڈ

کپتان بابراعظم، شان مسعود، فخر زمان، محمد رضوان، حارث سہیل، آغا سلمان، محمد نواز، اسامہ میر، محمد وسیم، محمد حسنین اور حارث رؤف۔

نیوزی لینڈ کا اسکواڈ

کپتان کین ولیمسن، فن ایلن، ڈیون کانوے، ڈیرل مچل، ٹام لیتھم، گلین فلپس، مچل پریسویل، مچل سینٹنر، اش سودھی، ٹم ساؤتھی اور لوکی فرگوسن۔