’مزید کامیابیاں مقدر بنیں‘ وسیم اکرم کی شاہین کو وکٹوں کی سنچری پر مبارکباد

قومی ٹیم کے سابق پیسر وسیم اکرم نے اپنے ٹیسٹ کیریئر میں وکٹوں کی سنچری مکمل کرنے والے فاسٹ بولر شاہین شاہ آفریدی کو مبارکباد پیش کی ہے۔
اپنی ٹوئٹ میں سوئنگ کے سلطان وسیم اکرم نے لکھا کہ میں ٹیسٹ میں 100 وکٹیں مکمل کرنے پر آپ کو مبارکباد پیش کرتا ہوں، یہ آنے والے بہت سے سنگ میلوں میں سے ایک ہے، مزید کامیابیاں آپ کا مقدر بنیں۔،،
واضح رہے کہ گال میں کھیلے جارہے سیریز کے پہلے ٹیسٹ میچ میں قومی ٹیم کے فاسٹ بولر شاہین آفریدی نے دوسرے اوور میں سری لنکن اوپنر نیشان مدھشکا کی وکٹ لے کر ٹیسٹ میچز میں 100 وکٹوں کا سنگ میل عبور کرنے والے پاکستان کے 19 ویں بولر بن گئے ہیں۔ 
پاکستان کی جانب سے ٹیسٹ کرکٹ میں سب سے زیادہ وکٹیں حاصل کرنے کا اعزاز قومی ٹیم کے سابق ٹیسٹ کپتان وسیم اکرم کے پاس ہے،انہوں نے 104 ٹیسٹ میچز میں 414 وکٹیں حاصل کیں، وقار یونس نے 87 ٹیسٹ میں 373، عمران خان نے 88 ٹیسٹ میں 362، دانش کنیریا نے 21 ٹیسٹ میں 261، یاسر شاہ نے 48 ٹیسٹ میں 244، عبدالقادر نے 67 ٹیسٹ میں 236،ثقلین مشتاق نے 49 ٹیسٹ میں 208، مشتاق احمد نے 52 ٹیسٹ میں 185، شعیب اختر نے 46 ٹیسٹ میں 178، سعید اجمل نے 35 ٹیسٹ میں 178 ،سرفراز نواز نے 55 ٹیسٹ میں 177، اقبال قاسم نے 50 ٹیسٹ میں 171 ،عمر گل نے 47 ٹیسٹ میں 163، فضل محمود نے 34 ٹیسٹ میں 139،انتخاب عالم نے 47 ٹیسٹ میں 125، محمد عامر نے 36 ٹیسٹ میچزمیں 119، محمد اصف نے 23 ٹیسٹ میچز میں 106 اور عبدالرزاق نے 46 ٹیسٹ میچزمیں 100 وکٹیں حاصل کر رکھی ہیں۔