ٹی ٹین کرکٹ کو فلم کی طرح دیکھنا چاہیے، ٹام بینٹن

ورچوئل پریس کانفرنس میں گفتگو کرتے ہوئے ٹام بینٹن نے کہا کہ ٹی ٹین کرکٹ فارمیٹ عمدہ اور تیز ترین ہے جو انٹرٹینمنٹ سے بھرپور ہے اور یہی وجہ ہے کہ اسے فلم کی طرح دیکھنا چاہیے۔ بعض شائقین کے لیے ٹیسٹ تو دور کی بات T20 دیکھنا بھی مشکل ہوتا ہے، ان کے لیے ٹی ٹین بہت اہم ہے وہ اسے فلم کی طرح دیکھ سکتے ہیں۔ یہی خاصیت ٹی ٹین کو اولمپکس کے لیے موزوں بناتی ہے۔

ٹیم دکن گلاڈی ایٹر کے حوالے سے گفتگو کرتے ہوئے ان کا کہنا تھا کہ ٹیم بہت اچھی ہے اور کوچز محنت اور لگن سے ٹیم کی پرفارمنس کو بہتر بنانے میں مصروف ہیں، قوی امید ہے کہ ٹیم بہترین کارکردگی کی وجہ سے نمایاں ہوگی۔

بہترین کھلاڑی سے متعلق سوال کے جواب میں بینٹن نے کہا کہ وینندر ہسرنگا بہترین گیند باز ہیں وہ کسی بھی وقت دوسری ٹیم کے لیے مشکلات پیدا کر سکتے ہیں ۔

ٹام بینٹن نے کہا کہ اچھے بلے باز کو اپنی کارکردگی کی طرف دھیان دینا چاہیے، بعض اوقات کچھ گیندیں ضائع بھی ہو جائیں تو فکر مند ہونے کی ضرورت نہیں بس اپنے کھیل کی طرف متوجہ ہوں اور اچھی کارکردگی دکھانے کی کوشش کریں کیونکہ ایک اچھا کھلاڑی کسی بھی جگہ شاٹ کھیل سکتا ہے ۔

اپنی کارکردگی اور آئندہ کے لائحہ عمل کے بارے میں ٹام بینٹن نے کہا کہ اکتوبر میں کرکٹ نہیں کھیلی زیادہ وقت فیملی اور دوستوں کے ساتھ گزارا اب امید ہے کہ آئندہ برسبین میں کھیلنے کے لیے تیار ہوں۔ ان کا کہنا تھا کہ نیشنل ٹیم میں واپس جانے کے لیے بھی تیار ہوں لیکن زیادہ دباؤ نہیں لینا چاہتا صرف اپنے کھیل سے لطف اندوز ہونا چاہتا ہوں ۔

واضح رہے کہ ٹام بینٹن ابوظبی کا تیسرا سیزن کھیل رہے ہیں اور اس سیزن میں دکن گلاڈی ایٹر کی نمائندگی کر رہے ہیں، ابوظبی ٹی ٹین کا آغاز 19نومبر سے ہو ا اور اس وقت پوائنٹ ٹیبل پر دکن گلاڈی ایٹر کی نمایاں پوزیشن ہے۔ ابوظبی ٹی ٹین سیزن فائیو میں 100سے زائد کرکٹر ہیں اور لیگ کا فائنل 4 دسمبر کو شیخ زائد کرکٹ اسٹیڈیم ابوظبی میں کھیلا جائے گا۔