برسبین: آسٹریلوی بلے باز ٹریوس ہیڈ کا انحصار پاکستان میں کھیل چکنے والے کھلاڑیوں سے دستیاب ’سیکنڈ ہینڈ‘ معلومات پر ہے۔
٢١ فروری ٢٠٢٢
آسٹریلوی ٹیم کے ایشز ہیرو اب پاکستان سے ٹیسٹ سیریز کی تیاریوں میں مصروف ہیں، کینگروز اسکواڈ کے بیشتر پلیئرز پہلی بار پاکستان کا سفر کریں گے، اس لیے انہیں یہاں کی کنڈیشنز کا کچھ خاص اندازہ نہیں ہے، ان کا انحصار پاکستان میں کھیل چکنے والے کھلاڑیوں سے دستیاب ’سیکنڈ ہینڈ‘ معلومات پر ہے، جسٹن لینگر بھی اس اہم دورے سے قبل ان سے الگ ہوچکے ہیں۔
ٹریوس ہیڈ نے لینگر سے اپنے تعلقات سے متعلق کہا کہ اس میں نشیب و فراز آتے رہے، تاہم ہمیں دورہ پاکستان میں ان کی کمی محسوس ہوگی، میرا ان کے ساتھ رابطہ بہتر رہا، اس میں کوئی شبہ نہیں کہ کچھ وقت چیلنجنگ بھی رہا لیکن ہم نے اچھا وقت گزارا، انہوں نے اعلی معیار طے کررکھے تھے، ان کی پلیئرز سے توقعات بہت بلند تھیں۔
دورہ پاکستان کے لیے ٹریوس ہیڈ گزشتہ برس کوئٹہ گلیڈی ایٹرز میں شامل رہنے والے ہموطن جیک ویدرلیڈ سے معلومات حاصل کررہے ہیں، دورہ پاکستان سے متعلق انہوں نے ملی جلی چیزیں سن رکھی ہیں، ان کے پاس اچھے فاسٹ بولرز ہیں، اسی طرح کچھ اچھے اسپنرز بھی ہمارے منتظر ہوں گے۔
.jpg)
