انگلش کپتان کے بعد مزید دو اہم پلئیرز کے میچز سے محروم ہونے کا خدشہ

پاکستان کیخلاف ٹی20 سیریز کے دوران انگلش ٹیم کے کپتان جوز بٹلر کے بعد مزید دو اہم کرکٹرز بھی چند میچوں سے محروم رہ سکتے ہیں۔ 
میڈیا رپورٹس کے مطابق آل راؤنڈر لیام لیونگ اسٹون اور فاسٹ بولر مارک ووڈ تاحال انجری سے صحتیاب نہیں ہوسکے ہیں، اس لیے امکان ہے کہ وہ پاکستان کیخلاف ٹی20 سیریز کے ابتدائی چند مقابلوں میں حصہ نہیں لیں گے۔ 
منگل کےروز پریس کانفرنس میں کپتان جوس بٹلر نے تصدیق کی تھی کہ لیام لیونگ اسٹون اور مارک ووڈ پہلے ٹی20 انٹرنیشنل کیلئے دستیاب نہیں ہوں گے۔ 
آئی پی ایل میں لیام لیونگ اسٹون گھٹنے کی انجری کا شکار ہوئے تھے جبکہ مارک ووڈ بھارت کیخلاف سیریز میں بائیں گھٹنے میں لگنے والی چوٹ سے صحتیاب ہورہے ہیں۔ 
دوسری جانب انگلش میڈیا نے کچھ روز قبل خبر دی تھی کہ کپتان جوس بٹلر کی اہلیہ لوئیس کی طبعیت ناساز ہے اور وہ تیسرے بچے کو جنم دینے کی توقع کررہی ہیں، جس کے باعث کرکٹر کی ابتدائی کچھ میچز میں شرکت غیر یقینی ہے۔ 
جوس بٹلر کی غیر موجودگی میں انگلش آل راؤنڈر معین علی ٹیم کے نائب کپتان ہوں گے جبکہ جوز بٹلر کی عدم موجودگی میں وکٹ کیپر کے فرائض فل سالٹ کو سونپے جائیں گے۔

خیال رہے کہ گزشتہ روز پاکستان اور انگلینڈ کے درمیان سیریز کا پہلا ٹی20 میچ بارش کے باعث منسوخ کردیا گیا تھا۔