کراچی: ایچ بی ایل پی ایس ایل 7 میں کورونا پروٹوکول کی خلاف ورزی پر امپائر فیصل آفریدی پر پانچ میچز کی پابندی اور 50فیصد فیس ادائیگی کا جرمانہ عائد کیا گیا۔
٠٣ فروری ٢٠٢٢
ایکسپریس نیوز کے مطابق کووڈ19 کے پروٹوکولز کی خلاف ورزی پر پی سی بی کے ایلیٹ پینل میں شامل امپائر فیصل خان آفریدی کو حفاظتی پروٹوکولز کی خلاف ورزی کرنے پر پانچ میچز کے لیے معطل کردیا گیا ہے۔ فیصلے کے مطابق ان پر میچ فیس کا پچاس فیصد جرمانہ بھی عائد کیا گیا ہے۔
پاکستان کرکٹ بورڈ کے چیف آپریٹنگ آفیسر سلمان نصیر کا کہنا ہے کہ پی سی بی نے ایچ بی ایل، پی ایس ایل 7 کے لیے بنائے گئے حفاظتی پروٹوکولز کی خلاف ورزی پر زیرو ٹالیرنس پالیسی اپنا رکھی ہے تاکہ تمام شرکا کی صحت اور حفاظت کو یقینی بناتے ہوئے ایونٹ کو کامیاب بنایا جاسکے۔
دوسری جانب فیصل خان آفریدی نے اپنے جرم کا اعتراف کرتے ہوئے اس پر معذرت کی اور کمیٹی کی جانب سے دی جانے والی سزا کو قبول کرنے کا اعلان کیا۔
اب امپائر فیصل آفریدی سزا مکمل کرکے دس فروری سے لاہور میں شروع ہونے والے لیگ کے دوسرے مرحلے میں دوبارہ شرکت کریں گے۔
.jpg)
