پی سی بی کی سلیکشن کمیٹی سے برطرفی کے بعد وہاب ریاض کا ردعمل

قومی ٹیم کی سلیکشن کمیٹی سے برطرف کئے جانے پر سابق کرکٹر وہاب ریاض نے پاکستان کرکٹ بورڈ (پی سی بی) کے پیروں تلے سے زمین نکالنے کا ارادہ کرلیا۔ 
سماجی رابطے کی ویب سائٹ ایکس (سابق ٹوئٹر) پر ٹوئٹ کرتے ہوئے قومی ٹیم کے سابق فاسٹ بولر وہاب ریاض نے لکھا کہ سلیکشن کمیٹی کے اوپر دباؤ ڈالنے جیسے بیان سے اتفاق نہیں کرتا، 1 ووٹ 6 پر کیسے حاوی ہوسکتا ہے؟ میٹنگ منٹس میں سب کچھ ریکارڈ پر موجود ہے۔،، 
انہوں نے کہا کہ سلیکشن کمیٹی سے فارغ کرنے اور سینئیر مینیجر کے عہدے سے سبکدوش کیے جانے پر آج شام کو اپنا بیان جاری کروں گا۔،،  
سابق کرکٹر نے کہا کہ پاکستان کرکٹ بورڈ (پی سی بی) کو ٹی20 ورلڈکپ 2024 کی شکست پر مجھے قربانی کا بکرا بنانے کی اجازت نہیں دوں گا۔،،  
قبل ازیں بورڈ کی جانب سے جاری کردہ بیان میں کہا گیا تھا کہ قومی ٹیم کی ناقص پرفارمنس پر سلیکٹر وہاب ریاض اور عبدالرزاق کو عہدے سے برطرف کردیا گیا ہے، اب دونوں سابق کرکٹرز آئندہ سلیکشن معاملات میں شامل نہیں ہوں گے۔ 
سابق کرکٹر عبدالرزاق اور وہاب ریاض کی جگہ نئے سلیکٹرز کا انتخاب کیا جائے گا۔ یہ فیصلہ سابق کرکٹرز کی جانب سے ٹیم سلیکشن پر تنقید کے بعد سامنے آیا ہے۔