فٹ ہو تو کھیلتے رہو, وسیم اکرم کا شعیب ملک اور حفیظ کو مشورہ

یواے ای میں جاری ٹی 20 ورلڈ کپ میں شعیب ملک اور محمد حفیظ بھی پاکستان کی کامیابیوں میں اپنا کردار ادا کر رہے ہیں، انہوں نے سینئر ہونے کے ناطے انفرادی کارکردگی کے ساتھ نوجوانوں کی رہنمائی کا سلسلہ بھی جاری رکھا ہوا ہے، دونوں نے میگا ایونٹ کے بعد انٹرنیشنل کرکٹ کو الوداع کہنے کا عندیہ دیا تھا تاہم فی الحال شعیب ملک نے اس حوالے سے اپنے ہونٹ سختی سے بند کرلیے ہیں۔

انہوں نے گزشتہ دنوں ریٹائرمنٹ کے سوال پر کہا تھا کہ فی الحال میری پوری توجہ ورلڈ کپ پر مرکوز ہے، ٹورنامنٹ کے دوران میں ریٹائرمنٹ کے حوالے سے کچھ بھی نہیں سوچ رہا۔

دوسری جانب محمد حفیظ نے بھی واضح طور پر کچھ نہیں کہا، فروری میں انہوں نے اپنے ایک انٹرویو میں کہا تھا کہ ٹیم کو ورلڈ کپ جتوا کر وہ ریٹائر ہوجائیں گے اور حال ہی میں وہ کسی نوجوان کو موقع دینے کی خاطر بنگلہ دیش میں شیڈول ٹی 20 سیریز سے دستبردار ہوچکے ہیں۔

پاکستان کے سابق فاسٹ بولر وسیم اکرم سمجھتے ہیں کہ دونوں سینئر آل راؤنڈرز جب تک فٹ ہیں اور پرفارم کررہے ہیں۔ انہیں کھیلنے کا سلسلہ جاری رکھنا چاہیے۔

انہوں نے کہا کہ اس حوالے سے فیصلہ ان دونوں کو ہی کرنا ہوگا،اگر وہ جسمانی طور پر فٹ ہیں اور اسی طرح پرفارم کرنے کا سلسلہ جاری رکھتے ہیں تو پھر انہیں کھیلتے رہنا چاہیے، وہ کوئی بھی فیصلہ کریں قوم کو ہر دونوں صورت میں انھیں سپورٹ کرنا چاہیے۔

یاد رہے کہ ٹی ٹوئنٹی ورلڈ کپ سپر 12 راؤنڈر کے تمام میچز جیتنے کے بعد اب پاکستان کا جمعرات کو سیمی فائنل میں آسٹریلیا سے مقابلہ ہوگا۔