کراچی: سابق کپتان وسیم اکرم نے ساحل پر گندگی کرنے والوں کو پھر آڑے ہاتھوں لے لیا۔
١٢ جنوری ٢٠٢٢
وسیم اکرم نے ایک بار پھر کراچی کے ساحل سمندر کی صفائی مہم شروع کردی۔ سماجی رابطے کی ویب سائٹ پر جاری کردہ اپنے ویڈیو پیغام میں وسیم اکرم نے ساحل سمندر کی سیر کے لیے آنے والے شہریوں سے اپیل کی کہ وہ ساحل دیکھنے ضرور آئیں مگر اس کی صفائی کا بھی خیال رکھیں۔
انہوں نے کہا کہ گندگی نہ پھیلائیں، کوڑے کرکٹ کے لیے پلاسٹک بیگ اپنے ساتھ لے کر آئیں تاکہ جاتے ہوئے وہ بیگ ساتھ لے جائیں۔
وسیم اکرم نے افسوس کا اظہار کرتے ہوئے کہا کہ لوگوں کو سمجھاتے ہوئے شرمندگی ہوتی ہے جیسے پانچ سال کے بچے کو سمجھایا جا رہا ہو، گندگی پھیلانے والے ڈھیٹ ہیں تو میں ان سے بڑا ڈھیٹ ہوں، ویڈیو بناتا رہوں گا جب تک ساحل ہمیشہ صاف نہیں رہتا۔
واضح رہے کہ وسیم اکرم ماضی میں کئی بار ساحل سمندر کی صفائی اور اس کی اہمیت کو اجاگر کرچکے ہیں، وقتی طور پر انتظامیہ بھی متحرک ہوتی ہے لیکن کراچی کے ساحلوں پر پھر وہی گندگی کے ڈھیر دکھائی دینے لگتے ہیں۔
.jpg)
