ویسٹ انڈیز نے دوسرے ٹی 20 میں بھی بھارت کو ہرادیا

ویسٹ انڈیز کی ٹیم اگرچہ ورلڈکپ 2023 کیلئے کوالیفائی نہیں کرسکی ہے مگر حیرت انگیز طور پر پیچھے رہ جانے والی اس ٹیم نے بھارت کی ناک میں دم کررکھا ہے، ٹیسٹ سیریز میں بھارت کو ٹف ٹائم دینے کے بعد ویسٹ انڈیز نے بھارت کے ساتھ ہونے والی ٹی 20 سیریز کے دوسرے میچ میں بھی شکست سے دوچار کر دیا۔ 
اتوار کے روز ویسٹ انڈیز کے پرویڈنس میدان میں کھیلے گئے ٹی ٹوئنٹی میچ میں بھارت نے ٹاس جیت کر پہلے بیٹنگ کا فیصلہ کیا تاہم، بھارتی بیٹنگ لائن شروع ہی سے مشکل میں نظر آئی، 18 رنز پر دو وکٹیں گر گئیں، پھر تلک ورما نے 51 رنز کی اچھی اننگز کھیلی جبکہ کپتان ہاردک پانڈیا نے 24 رنز بنائے۔ 
بھارتی ٹیم نے مقررہ 20 اوورز میں7 وکٹوں کے نقصان پر 152 رنز بنائے، ویسٹ انڈیز کی جانب سے عقیل حسین ، الزاری جوزف اور روماریو شیفرڈ نے 2،2 وکٹیں حاصل کیں۔ جبکہ میچ کے دوسرے مرحلے میں 153 رنز کے ہدف کے تعاقب میں ویسٹ انڈیز کی دو وکٹیں پہلے ہی اوور میں گر گئیں  لیکن نکولس پورن اس موقع پر ڈٹ گئے اورانہوں نے 4چھکے اور 6  چوکے لگائے اور40 گیندوں پر67 رنز کی شاندار اننگز کھیلی۔ 
اس کے علاوہ  پائول 21 اور ہیٹمائرنے 22 رنز بنائے، تاہم آخر میں عقیل حسین نے 16 اور الزاری جوزف نے 10 رنز کی ناقابل شکست اننگز کھیل کر ویسٹ انڈیز کو 2  وکٹوں سے کامیابی دلا دی۔ جس کے نتیجے میں ویسٹ انڈیز کو 5 میچز کی سیریز میں دو صفر کی برتری  حاصل ہوگئی ہے۔ 
دوسری جانب ویسٹ انڈیز سے مسلسل دوسرے ٹی ٹوئنٹی میچ میں شکست پر بھارتی ٹیم تنقید کی زد میں ہیں۔ 
واضح رہے کہ رواں سال آئی سی سی ورلڈ کپ کوالیفائرز میں شکست کے بعد ویسٹ انڈیز اکتوبر میں بھارت میں ہونے والے 50 اوورز کے ورلڈکپ کے لیے پہلی بار کوالیفائی نہیں کرسکا تھا۔
اس کے علاوہ 2022 کے ٹی ٹوئنٹی ورلڈکپ میں بھی ویسٹ انڈیز ٹیم کوالیفائنگ راؤنڈ میں ہی باہرہوگئی تھی۔ 
ٹی ٹوئنٹی ورلڈکپ کے کوالیفائنگ راؤنڈ کے میچ میں آئرلینڈ نے ویسٹ انڈیز کو شکست دے کر سپر 12 مرحلے کے لیے کوالیفائی کیا تھا اور ساتھ ہی ویسٹ انڈیز کو ٹورنامنٹ سے باہر کردیا تھا۔