جنوبی افریقہ کے خلاف تین میچوں کی ٹی 20سیریز اگلے ماہ شروع ہونے والے آئی سی سی مینز ٹی 20 ورلڈ کپ سے قبل بہت سے کھلاڑیوں کے لیے تیاری کے ایک اہم موقع کے طور پر کام کرے گی۔
ویسٹ انڈیز نے جنوبی افریقہ کے خلاف تین میچز کی ٹی ٹوئنٹی سیریز کے لیے اہم کھلاڑیوں کو آرام دے دیا۔
ویسٹ انڈیز نے رواں ہفتے سے جنوبی افریقہ کے خلاف شروع ہونے والی ٹی20 سیریز کے لیے اپنے 15 رکنی اسکواڈ کا اعلان کر دیا ہے۔
تین میچوں کی یہ سیریز اگلے ماہ شروع ہونے والے آئی سی سی ورلڈ کپ 2024 سے قبل بہت سے کھلاڑیوں کے لیے خود کو تیار اور اپ گریڈ کرنے کا اہم موقع ہے۔
ویسٹ انڈیز کے ریگولر کپتان روومین پاول کو آرام دیا گیا ہے جب کہ ان کی جگہ بلے باز برینڈن کنگ کپتان کی ذمہ داریاں سنبھالیں گے۔
دیگر قابل ذکر غیرحاضر کھلاڑیوں میں ٹاپ آرڈر بلے باز شائی ہوپ اور نکولس پوران شامل ہیں جو آئی پی ایل ختم ہونے کے بعد آرام کریں گے۔
فاسٹ بولر الزاری جوزف اور اہم بلے باز شیرفین ردرفورڈ پلے آف کے لیے اپنی آئی پی ایل ٹیموں کے ساتھ بھارت میں ہی رہیں گے اور ویسٹ انڈیز کی ٹیم میں صرف اس صورت میں شامل ہوں گے جب ان کی آئی پی ایل ٹیمیں فائنل میں نہیں پہنچ پائیں گی۔
واضح رہے کہ بھارت میں جاری آئی پی ایل ویسٹ انڈیز اور جنوبی افریقہ کے درمیان ہونے والی تین میچوں کی ٹی 20 سیریز سے متصادم ہوگا اسی لیے ویسٹ انڈیز نے آئی پی ایل کھیلنے والے اپنے قومی کھلاڑیوں کو آئی پی ایل ختم ہونے تک اپنی اپنی فرنچائزز کے ساتھ رہنے کی اجازت دے رکھی ہے۔