ٹی20 ورلڈکپ: نیوزی لینڈ کو ہراکرویسٹ انڈیز بھی سپر8 میں پہنچ گیا

 ویسٹ انڈیز نے کیوی ٹیم کو 13 رنز سے شکست دے دی۔ میگا ایونٹ کے گروپ سی میں نیوزی لینڈ کا یہ دوسرا اور ویسٹ انڈیز کا تیسرا میچ تھا۔ اس ہار کے بعد بلیک کیپس پوائنٹس ٹیبل پر  اپنے گروپ میں سب سے نیچے ہیں اور ناک آؤٹ ہونے کی راہ پر گامزن ہیں۔
تفصیلات کے مطابق ٹی 20 ورلڈ کپ 2024 کےاہم میچ میں ویسٹ انڈیز نے نیوزی لینڈ کو شکست دے کرسپر 8 مرحلے تک رسائی حاصل کرلی۔  
آئی سی سی ٹی 20 ورلڈ کپ کے 26 میچ میں نیوزی لینڈ نے ٹاس جیت کر ویسٹ انڈیز کو پہلے بیٹنگ کی دعوت دی، ویسٹ انڈیز نے مقررہ 20 اوورز میں 9 وکٹوں کے نقصان پر 149 رنز بنائے اور بلیک کیپس کو جیت کے لیے ڈیڑھ سو رنز کا ہدف دیا۔ 
ٹرینیڈاڈ کے برائن لارا اسٹیڈیم میں کھیلے جانے والے اس میچ میں ویسٹ انڈیز کا آغاز انتہائی مایوس کن تھا، ابتدائی 5 بیٹرز صرف 30 رنز پر پویلین لوٹ گئے، برینڈن کنگ 9، جانسن چارلس صفر، نکولس پوران 17، روسٹن چیز صفر اور کپتان رؤمن پاول صرف ایک رن بنا سکے
کیوی بولرز کی عمدہ بولنگ کے خلاف شیرفین ردر فورڈ کی مزاحمتی اننگز سب سے نمایاں تھی جنہوں نے 68 رنز کی ناقابل شکست اننگز کھیلی، عقیل حسین نے 15، آندرے رسل نے 14 اور الزاری جوزف نے 6 رنز بنائے۔ 
نیوزی لینڈ کی جانب سے ٹرینٹ بولٹ نے 3 کھلاڑیوں کو آؤٹ کیا جبکہ ٹم ساؤتھی اور لوکی فرگوسن نے 2،2 کھلاڑیوں کو آؤٹ کیا، جیمز نیشم اور مچل سینٹنر نے 1،1 وکٹ حاصل کی۔ 
ہدف کے تعاقب میں نیوزی لینڈ کی ٹیم مقررہ 20 اوورز میں 9 وکٹوں کے نقصان پر 136 رنز ہی بناسکی، بیٹر گلین فلپس 33 گیندوں پر40 رنز بناکر نمایاں رہے، فن ایلن نے 26 جب کہ مچل سینٹنر نے ناقابلِ شکست 21 رنز اسکور کیے۔ 
ویسٹ انڈیز کی جانب سے الزاری جوزف نے 4 اوورز میں 19 رنز دے کر 4 کھلاڑیوں کو آؤٹ کیا، گڈاکیش موتی نے چار اوورز میں 25 رنز دیے اور 3 کھلاڑی پویلین بھیجے، عقیل حسین نے 21 رنز دے کر ایک کھلاڑی کو آؤٹ کیا۔ 
میگا ایونٹ کے گروپ سی میں نیوزی لینڈ کا یہ دوسرا اور ویسٹ انڈیز کا تیسرا میچ تھا۔ 
اسکواڈز: 
ویسٹ انڈیز: رؤمن پاول (کپتان)، نکولس پوران (وکٹ کیپر)، جانسن چارلس، برینڈن کنگ، شیرفین ردر فورڈ، آندرے رسل، روماریو شیفرڈ، عقیل حسین،الزاری جوزف، گڈاکیش مورتی۔
نیوزی لینڈ:
فن ایلن، ڈیون کونوے (وکٹ کیپر)، کین ولیمسن (کپتان)، ڈیرل مچل، گلین فلپس، جیمز نیشم، مچل سینٹنر، راچن رویندرا، ٹم ساؤتھی، لوکی فرگوس، ٹرینٹ بولٹ۔