ویمن ورلڈکپ میں ناقص کارکردگی: بسمہ معروف کو کپتانی سے ہٹائے جانے کا امکان

ایکسپریس نیوز کو ذرائع سے ملنے والی خبروں کے مطابق نیوزی لینڈ میں جاری ویمن ورلڈکپ میں قومی ٹیم کی انتہائی خراب اور ناقص کارکردگی پر پاکستان کرکٹ بورڈ (پی سی بی) کے چیئرمین رمیز راجہ سخت ناراض اور ناخوش ہیں اور انہوں نے ویمن وننگ سے رپورٹ طلب کرلی ہے، قومی ٹیم کی وطن واپسی پر آپریشن کلین اپ ہوگا۔

کپتان بسمہ معروف کی چھٹی سمیت خراب ترین کارکردگی کا مظاہرہ کرنے والی سینئر کھلاڑیوں کو فارغ کیا جاسکتا ہے، نئی کپتان کے تقرر اور ٹیم مینجمنٹ میں بھی نئے لوگوں کو شامل کیا جائے گا۔ ذرائع کا کہنا ہے کہ بسمہ معروف کی قیادت میں پاکستانی ویمنز ٹیم نے اب تک 6 میچوں میں سے صرف ایک میں کامیابی حاصل کی ہے، قومی ٹیم کا آخری میچ ہفتے کو میزبان نیوزی لینڈ سے طے ہے۔ ٹیم کی روانگی سے قبل دعویٰ کیا گیا تھا کہ پاکستان سیمی فائنل تک رسائی حاصل کرنے میں ضرور کامیاب ہوگا لیکن اب تک کے نتائج اس کے برعکس اور بدترین رہے ہیں کیونکہ پوائنٹس ٹیبل پر قومی ویمن ٹیم سب سے آخری نمبر پر ہے۔

میگا ایونٹ میں خراب پرفارمنس پر ٹیم کوچ، کپتان اور مینیجر سے الگ الگ رپورٹ طلب کی گئی ہے۔ بورڈ حکام کپتان اور سینئر کھلاڑیوں کی گروپنگ کے ساتھ من مانیوں کے معاملے پر بھی کارروائی کرنے کا ارادہ رکھتے ہیں۔ ٹیم میں شامل کئی کھلاڑی خراب پرفارمنس کے باوجود عرصہ دراز سے کھیل رہی ہیں، ان کی جگہ نئی کھلاڑیوں کو آزمانے کا فیصلہ ہوا ہے۔