ویمنز انڈر 19 ورلڈ کپ: پاکستانی ٹیم دوسری آزمائش میں ناکام

ویمنز انڈر 19 ورلڈ کپ میں انگلینڈ نے پاکستان کو 53 رنز سے ہرادیا، فاتح الیون نے 7 وکٹوں کے نقصان پر 156 رنز بنائے، سیرین سمیل نے 33 گیندوں پر 37 رنز اسکورکیے، انوشہ ناصر نے 20رنز دے کر 2 وکٹیں اپنے نام کیں۔

پاکستانی ٹیم 5 وکٹیں کھوکر 103 رنز بناسکی، سیدہ عروب شاہ نے 34 رنز بنانے کے لیے 36 گیندوں کا سامنا کیا، صوفیہ سمیل نے 10 رنز دے کر 2 شکار کیے.

دوسری جانب روانڈا نے سنسنی خیز مقابلے کے بعد زمبابوے کو 39 رنزسے شکست دے دی

فاتح الیون نے 8 وکٹوں کے نقصان پر 119 رنز بنائے، گیزل 34 رنز بناکر نمایاں رہیں، حریف سائیڈ 80 رنز پر ڈھیر ہوگئی، ایم ٹومبا نے 20 رنز بنائے، ہینریٹ ایشموے نے 4 گیندوں پر لگاتار 4 وکٹیں اڑائیں، اس کامیابی کے ساتھ روانڈا نے ورلڈ کپ میں پہلی فتح اپنے نام کی۔

نیوزی لینڈ نے آئرلینڈ کو 9 وکٹوں سے آؤٹ کلاس کردیا، آئرش ٹیم 74 رنز پر ہمت ہارگئی، زارا کریگ نے 20 رنز بناکر کچھ حوصلہ بڑھایا، نتاشا کوڈائر نے 6 رنز دے کر 3 وکٹیں اڑائیں،کیویز نے ہدف محض ایک وکٹ کھوکر حاصل کرلیا۔ اینا براؤننگ نے 14 گیندوں پر 29 رنز اسکور کیے، جورجینا ڈیمپسے نے ایک وکٹ اپنے نام کی۔

ویسٹ انڈیز نے انڈونیشیا کو 77 رنز سے قابو کرلیا، کامیاب سائیڈ نے 3 وکٹوں کے نقصان پر 177 رنز بنائے، زائیڈہ جیمز نے 55 رنز کی اننگز کھیلی، نی سورانیشا نے 22 رنز دے کر ایک وکٹ حاصل کی، حریف ٹیم 9 وکٹوں کے نقصان پر صرف 99 رنز بناسکی، کیڈیک کورنی آرتانی 15 رنز بنا کر نمایاں رہیں، ڈیجینبا جوزف نے 14 رنز دے کر 3 پلیئرز کو پویلین چلتا کیا۔