ورلڈکپ 2023: پاکستان کا سیکیورٹی وفد بھارت کا دورہ کرے گا

بھارت میں شیڈول آئی سی سی ون ڈے ورلڈکپ 2023 میں قومی ٹیم کی شرکت سے قبل پاکستان کا سیکیورٹی وفد بھارت کا دورہ کرکے حفاظتی انتظامات کا جائزہ لے گا۔

بھارتی میڈیا کی رپورٹس کے مطابق وزارت برائے بین الصوبائی رابطہ کے ایک سرکاری ذرائع کا حوالہ دیتے ہوئے بتایا کہ حکومت پاکستان کرکٹ بورڈ (پی سی بی) نئے چیئرمین کے انتخاب کے بعد سیکیورٹی وفد بھارت بھیجے گی، وفد پی سی بی کی نمائندگی کے ساتھ ان مقامات کا جائزہ لے گا جہاں پاکستانی ٹیم کو اپنے میچز کھیلنے ہیں۔

امکان ظاہر کیا جارہا ہے کہ پاکستان کا سیکورٹی وفد چنئی، بنگلور، حیدرآباد، کولکتہ اور احمد آباد کا دورہ کرے گا۔

رپورٹ میں کہا گیا ہے کہ عہدیدار نے بتایا کہ ٹیم کے دورہ بھارت اور میچ وینیوز کے حوالے سے حکومت پاکستان کی کلیئرنس درکارہوتی ہے، میگا ایونٹ میں شرکت سمیت دیگر معاملات حکومتی کلیئرنس سے مشروط ہیں۔

پاکستانی سیکیورٹی وفد بھارت کے اعلیٰ عہدیداروں کے ساتھ بات چیت کرے گا اور کھلاڑیوں، عہدیداروں، شائقین اور میڈیا کی سیکیورٹی انتظامات کا جائزہ لے گا، بعدازاں بورڈ اور حکام کو آگاہ کرنے کے بعد قوممی ٹیم کو بھیجنے کا فیصلہ ہوگا۔

 اگر وفد کو کوئی خدشات نظر آتے ہیں تو پی سی بی رپورٹ کو آئی سی سی اور بی سی سی آئی کے ساتھ شیئر کرے گا۔

قبل ازیں گزشتہ ماہ کے آخر میں ترجمان دفتر خارجہ زہرہ بلوچ نے کہا تھا کہ بھارت میں شیڈول ورلڈکپ 2023 کیلئے پاکستانی ٹیم کی شرکت کے حوالے سے تمام پہلوؤں کا جائزہ لے رہے ہیں۔