پچھلی ایک دہائی کے دوران ویرات کوہلی سے بڑا کوئی بیٹر میری نظر میں نہیں آیا، سابق کپتان
١٤ جون ٢٠٢٣
قومی کرکٹ ٹیم کے سابق ہیڈکوچ اور کپتان مصباح الحق کا کہنا ہے کہ ورلڈکپ کا فائنل پاکستان اور بھارت کے درمیان دیکھنے کی خواہش ہے۔
بھارتی اسپورٹس چینل کو دیئے گئے انٹرویو میں سابق ہیڈکوچ مصباح الحق نے کہا کہ پاکستانی اور بھارتی فینز کی یہی خواہش ہوتی ہے کہ ہندوستان اور پاکستان کے درمیان ورلڈکپ کا فائنل ہو، لیکن ظاہر ہے جو ٹیم سارے میچوں میں اچھا کھیلے گی وہی فائنل کھیلے گی۔
انہوں نے کپتان بابراعظم اور بھارتی بلے باز ویرات کوہلی کی تعریف کی اور کہا کہ ایک دہائی کے دوران ویرات کوہلی سے بڑا کوئی بیٹر میری نظر میں نہیں آیا البتہ بابراعظم نے اب اپنے پاؤں جمائے ہیں اور وہ مسلسل ریکارڈز پر نظر رکھے ہوئے ہیں۔
دوسری جانب غیر حتمی شیڈول کے مطابق ورلڈ کپ میں پاک، بھارت کرکٹ جنگ کا دن مقرر ہوگیا جبکہ دونوں روایتی حریفوں کے درمیان ٹاکرا 15 اکتوبر کو احمد آباد میں منعقد ہوگا۔
2019 میں سنسنی خیز فائنل کھیلنے والی انگلینڈاور نیوزی لینڈ کی ٹیمیں بھی 15 اکتوبرکو افتتاحی دن میدان میں اتریں گی۔
کرک انفو کے مطابق بھارتی ٹیم اپنے لیگ میچز ملک کے مختلف 9 وینیوز پر کھیلے گی، پاکستانی ٹیم کو لیگ میچز میں 5 وینیوز پر حریف ٹیموں کا سامنا کرنا ہوگا، پاکستان کو کوالیفائر سے آنے والی 2 ٹیموں کے خلاف 6 اور 12 اکتوبر کو حیدرآباد دکن میں کھیلنا ہوگا، جس کے بعد گرین شرٹس 20 اکتوبر کو بنگلور میں آسٹریلیا کے مقابل آئیں گے۔
.jpg)
