میگا ایونٹ کے فائنل میں بھارتی وزیراعظم کی آمد بھی متوقع ہے، رپورٹس
١٧ نومبر ٢٠٢٣
بھارتی فضائیہ کی سوریا کرن ایروبیٹک ٹیم احمد آباد کے نریندر مودی کرکٹ اسٹیڈیم میں 19 نومبر کو کھیلے جانے والے آئی سی سی ورلڈکپ 2023 کے فائنل میچ سے قبل ایئرشو کا انعقاد کرے گی۔
ڈیفنس پرو برائے گجرات نے اعلان کیا ہے کہ بھارتی فضائیہ کی ایک ٹیم نریندر مودی اسٹیڈیم میں کھیلے جانے والے فائنل میچ سے قبل 10 منٹ تک ایئرشو فارمنس کا مظاہرہ کرے گی، جس سے میدان میں بیٹھے شائقین اور ٹی وی پر میچ دیکھنے والے ناظرین لطف اندوز ہوسکیں گے۔
بھارتی میڈیا کی رپورٹس کے مطابق میگا ایونٹ کے فائنل میچ میں وزیراعظم نریندر مودی سمیت دیگر ممالک کے کرکٹ بورڈز کے اعلیٰ عہدیداران، بالی ووڈ اسٹارز جبکہ بزنس ٹائیکونز کی آمد بھی متوقع ہے۔
خیال رہے کہ ورلڈ کپ کے پہلے سیمی فائنل میں بھارت نے نیوزی لینڈ کو شکست دے کر فائنل کیلئے کوالیفائی کیا تھا، یہ پہلا موقع ہے کہ ورلڈکپ کے ناک آؤٹ مرحلے میں بھارت نے کیویز کو ہرایا ہو۔
دوسری جانب گزشتہ روز آسٹریلیا نے ورلڈ کپ کے دوسرے سیمی فائنل میں جنوبی افریقہ کو شکست دیکر فائنل کھیلنے کے لیے کوالیفائی کیا تھا، دونوں ٹیموں کے درمیان 19 نومبر کو (اتوارکےروز) میگا ایونٹ کا فائنل میچ کھیلا جائے گا۔۔
.jpg)
