نیدرلینڈزکے بولرنےورلڈکپ میں بدترین بولنگ کاریکارڈ اپنےنام کرلیا

نیدرلینڈز کے بولر باس ڈی لیڈے نے بھارت میں جاری میگا ایونٹ ورلڈ کپ 2023میں بدترین بولنگ کا ریکارڈ اپنے نام کرلیا۔ 
دہلی کے ارون جیٹلی اسٹیڈیم میں بدھ کے روز کھیلے گئے میچ میں نیدرلینڈز کو آسٹریلیا کے ہاتھوں آئی سی سی ورلڈ کپ کی تاریخ میں سب سے بڑے 309 رنز کے مارجن سے شکست ہوئی۔ 400 رنز کے جواب میں ڈچ ٹیم صرف 90 رنز بناسکی۔ 
میچ میں آسٹریلیا کے دو بلے بازوں ڈیوڈ وارنر اور گلین میکسویل نے سنچریاں اسکور کیں جبکہ اسٹیون اسمتھ نے 71 اور مارنوس لبوشین نے 62 رنز کی شاندار اننگز کھیلی۔ 
آسٹریلوی بلے باز گلین میکسویل نے دھواں دھار بیٹنگ کرتے ہوئے ورلڈ کپ کی تاریخ کی تیز ترین سنچری اسکور کرنے کا اعزاز بھی اپنے نام کرلیا۔ انہوں نے 40 گیندوں پر سنچری مکمل کی اور 106 رنز بناکر آؤٹ ہوئے۔ 
نیدرلینڈز کے بولر باس ڈی لیڈے میچ کے دوران سب سے مہنگے بولر ثابت ہوئے جنہوں نے 10 اوورز میں 115 رنز دیکر ون ڈے کی تاریخ کا سب سے مہنگا بولنگ اسپیل کرانے کا ریکارڈ توڑ دیا۔ انہوں نے دو وکٹیں بھی حاصل کیں۔ 
اس سے قبل ورلڈ کپ میں سب سے بدترین بولنگ کا ریکارڈ آسٹریلیا کے مک لیوس کا تھا جنہوں نے 2006 میں جنوبی افریقہ کیخلاف 113 رنز کھائے تھے اور کوئی وکٹ نہیں لے سکے تھے۔ 
رواں ٹورنامنٹ کے دوران جنوبی افریقہ کیخلاف میچ میں آسٹریلیا کے ایڈم زمپا نے 110 رنز کے عوض کوئی وکٹ نہیں لی تھی۔ یہ ورلڈ کپ میں تیسرے نمبر پر سب سے بدترین بولنگ تھی۔ 
چوتھے نمبر پر پاکستان کے سابق فاسٹ بولر وہاب ریاض اور افغانستان کے راشد خان ہیں۔ وہاب ریاض نے 2016 میں انگلینڈ کیخلاف میچ میں 110 رنز دیے تھے اور کوئی وکٹ نہیں لے سکے تھے جبکہ 2019 میں انگلینڈ کیخلاف میچ میں راشد خان نے 110 رنز کھائے تھے اور کوئی وکٹ نہیں لے سکے تھے۔