ینگسٹرز کو قذافی اسٹیڈیم میں کھیلنے کا موقع مل گیا

ینگ پلیئرز کو قذافی اسٹیڈیم میں کھیلنے کا موقع مل گیا جب کہ رمضان انٹر کالجیٹ ٹی20 ٹورنامنٹ کا لاہورمیں باقاعدہ آغاز ہوگیا۔ 
گزشتہ روز قومی ترانے کے بعد محسن نقوی نے ٹرافی کی رونمائی کرتے ہوئے ایونٹ کا افتتاح کیا، بعد ازاں ایم اے او کالج اور گورنمنٹ کالج یونیورسٹی کے مابین میچ شروع ہوا، فائنل 8اپریل کو کھیلا جائے گا۔ 
لاہور لیگ کے میچز ایل سی سی اے گراؤنڈ سے قذافی اسٹیڈیم منتقل کر دیے گئے ہیں، شریک ٹیمیں پی سی بی ہیڈ کوارٹرز میں موجود ہوم اور اوے ڈریسنگ رومز استعمال کریں گی، ٹورنامنٹ کی پچز اسٹیڈیم کے گراؤنڈ اسٹاف کے ذریعے تیار کی جائیں گی۔  
پی سی بی نے تماشائیوں کو کھیل دیکھنے کے لیے مفت داخلے کی اجازت بھی دے دی ہے، فضل محمود انکلوژر کو میچ شروع ہونے سے ایک گھنٹے قبل کھول دیا جائے گا، ایونٹ میں شریک 10ٹیموں کے مابین21 میچز پی ٹی وی اسپورٹس پر براہ راست نشر کیے جائیں گے تاکہ مسابقتی کرکٹ میں نئے اور باصلاحیت کھلاڑیوں کی حوصلہ افزائی ہوسکے، پورے ٹورنامنٹ کے لائیواسکورز بھی دستیاب ہوں گے۔ 
دوسری جانب کراچی ریجن ٹورنامنٹ ہفتے کوشروع ہوگا، ایونٹ میں شہر کے10 منتخب کالجز کی ٹیموں کے درمیان لیگ کی بنیاد پرعیدگاہ گراؤنڈ ناظم آباد اور آئی بی اے کراچی یونیورسٹی گراؤنڈ میں میچز کھیلے جائیں گے۔ 
افتتاحی تقریب میں کراچی ریجن کرکٹ ایسوسی ایشن کے صدراورکوئٹہ گلیڈی ایٹرزکے اونرندیم عمرمہمان خصوصی ہوں گے، فائنل 4 اپریل کو طے ہے، فاتح ٹیم 5 لاکھ ملیں گے اور رنراپ ٹیم ڈھائی لاکھ روپے انعام کی حقدارہوگی، ہرمیچ کے بہترین کھلاڑی کو5 ہزارروپے انعام دیا جائے گا۔