افغانستان کے خلاف میچ سے قبل ذکاء اشرف سے قومی ٹیم کی ملاقات

پاکستان کرکٹ بورڈ کی منیجمنٹ کمیٹی کے سربراہ ذکا اشرف نے کہا ہے کہ قومی ٹیم کے کپتان بابر اعظم کے پاس بہت باصلاحیت ٹیم ہے، امید ہے کہ ایشیا کپ ہم ہی جیتیں گے اور جیت کے اسی تسلسل کے ساتھ ورلڈ کپ میں شرکت کرکے ایک بار پھر میگا ایونٹ کی ٹرافی جیتیں گے۔ 
سری لنکا کے شہر ہمبنٹوٹا میں افغانستان کے خلاف پہلے ون ڈے میچ سے قبل چیئرمین پی سی بی مینجمنٹ کمیٹی ذکاء اشرف سے قومی ٹیم کے کھلاڑیوں نے اہم ملاقات کی۔ اس موقع پر ذکاء اشرف نے کھلاڑیوں سے کہا کہ مجھے بڑی امید ہے کہ آپ کی کوشش اورمحنت سے پاکستان ایشیا کپ جیتے گا، یہ سیریز جیت کر مومنٹم حاصل کریں اور اسی اعتماد کے ساتھ ورلڈ کپ میں شرکت کرتے ہوئے ورلڈ کپ ٹرافی کو ضرور وطن واپس لائیں گے۔ 
ذکاء اشرف نے مزید کہا کہ بابر اعظم کی قیادت میں یہ ٹیم بہت اچھا پرفارم کر رہی ہے، بابر اعظم کے پاس بہت باصلاحیت ٹیم ہے، ہر کوئی اپنے کردار میں اچھا پرفارم کر رہا ہے، ہمارے پاس ورلڈ کلاس بولرز اور بیٹرز ہیں جبکہ ہمارا کمبی نیشن اچھا ہے، کوئی وجہ نہیں ہے کہ ہم ٹرافی نہ جیتیں۔ 
چیئرمین مینجمنٹ کمیٹی نے کہا کہ پاکستان اوردنیا بھرکے سابق کرکٹرز پاکستانی ٹیم کو مضبوط قرار دے رہے ہیں۔ ان کا کہنا تھا کہ جس فارم میں اس وقت قومی ٹیم ہے وہ کسی کو بھی ہراسکتی ہے، سابق کرکٹرز کے خیال میں ہم ایشیا کپ کی سب سے فیورٹ ٹیم ہیں، ہم اس سے پہلے بھی ورلڈ کپ جیت چکے ہیں، 2 مرتبہ ایشیا کپ بھی جیتا ہوا ہے، ہمیں اس کی کوئی وجہ دکھائی نہیں دیتی کہ ہم دوبارہ نہیں جیت سکتے، آپ میدان میں اپنا بہترین کھیل پیش کریں نیک خواہشات آپ کے ساتھ ہیں۔