ذکا اشرف پی سی بی مینجمنٹ کمیٹی کے سربراہ کےعہدے سے مستعفی

ذکا اشرف نے بے اختیار چئیرمین رہنے کے بجائے عہدہ چھوڑنے کا فیصلہ کیا، ذرائع

پاکستان کرکٹ بورڈ کی مینجمنٹ کمیٹی کے سربراہ ذکا اشرف نے اپنے عہدے سے استعفیٰ دے دیا۔
ذرائع کے مطابق ذکا اشرف نے اختیارات کے معاملے پر استعفیٰ دینے کا فیصلہ کیا، جس کے بعد انہوں نے تحریری طور پر اپنا استعفیٰ نگراں وزیر اعظم انوار الحق کاکڑ کو منظوری کے لیے بھیج دیا۔
پی سی بی مینجمنٹ کمیٹی کے سربراہ کے قریبی ذرائع نے بتایا کہ ذکا اشرف نے بے اختیار چئیرمین رہنے کے بجائے عہدہ چھوڑنے کا فیصلہ کیا اور پھر تحریری طور پر اس سے وزیراعظم کو بھی آگاہ کردیا ہے۔
واضح رہے کہ ایک روز قبل نگراں حکومت نے پاکستان کرکٹ بورڈ کی مینجمنٹ کمیٹی کو کام جاری رکھنے کی ہدایت کی تھی، جس کے بعد لاہور کی نیشنل کرکٹ اکیڈمی میں جمعہ کے روز پاکستان کرکٹ بورڈ کی مینجمنٹ کمیٹی (ایم سی) کے چوتھے اجلاس کی صدارت ذکا اشرف نے کی تھی۔