ڈاکٹرسہیل سلیم کا استعفیٰ کھلاڑیوں کی میڈیکل رپورٹس جاری ہونے کے بعد سامنے آیا۔
پالستان کرکٹ بورڈ (پی سی بی) کے میڈیکل کمیشن کے سربراہ ڈاکٹر سہیل سلیم اپنے عہدے سے مستعفی ہوگئے۔ ذرائع کے مطابق پاکستان کرکٹ بورڈ کے میڈیکل کمیشن کے سربراہ ڈاکٹر سہیل سلیم نے انجرڈ کھلاڑیوں کی میڈیکل رپورٹ سامنے آنے کے بعد اپنا استعفیٰ چیئرمین پی سی بی کو بھجوادیا ہے۔
ذرائع کے مطابق پی سی بی کے چیئرمین محسن نقوی نے احسان اللہ، ارشد اقبال اور ذیشان ضمیر سمیت دیگر کھلاڑیوں کی انجریز کا جائزہ لینے کے لیے ایک آزاد انکوائری کمیٹی تشکیل دی تھی۔ کمیٹی نے اپنی رپورٹ کرکٹ بورڈ کو پیش کر دی ہے۔
چیئرمین پی سی بی محسن نقوی نے چند روز قبل اعلان کیا تھا کہ اَن فٹ کھلاڑیوں احسان الله، ارشد اقبال، ذیشان ضمیر کی انجریز کی تشخیص کے بعد کھلاڑیوں کی انجریز کی غلط تشخیص کرنے اور نامناسب علاج کے ذمہ داران کے خلاف تادیبی کارروائی کی جائے گی۔ جس کے یے ایک آزاد انکوائری کمیٹی بھی تشکیل دی گئی تھی، تازہ ترین پیشرفت میں کمیٹی نے اپنی رپورٹ کرکٹ بورڈ کو جمع کروا دی ہے۔
محسن نقوی کی جانب سے اس بات کا عندیہ دیا گیا تھا کہ کمیٹی کی رپورٹ میں اگر اس بات کی نشاندہی کی گئی کہ کھلاڑیوں کی انجریز کی تشخیص میں کوئی کوتاہی ہوئی ہے تو ذمے داروں کے خلاف سخت ایکشن لیا جائے گا۔
واضح رہے کہ ڈاکٹر سہیل سلیم پی ایس ایل میں کورونا کیسز کے ایشو پر بھی مستعفی ہوئے تھے، تاہم سابق سربراہ ذکا اشرف کے دور میں ان کی پاکستان کرکٹ بورڈ میں دوبارہ واپسی ہوئی تھی۔