اسلام قبول کرنے پر غور! ہربھجن نے انضمام کو آڑے ہاتھوں لے لیا

قومی ٹیم کے سابق چیف سلیکٹر اور کپتان انضمام الحق کو سابق بھارتی کرکٹر ہربھجن سنگھ نے آڑے ہاتھوں لے لیا۔ 
سابق کرکٹر انضمام الحق کی ایک ویڈیو وائرل ہورہی ہے جس میں وہ بتائے ہوئے نظر آرہے ہیں کہ ہربھجن سنگھ، مولانا طارق جمیل کے سحر میں مبتلا تھے اور انہوں نے اسلام قبول کرنے کا بھی سوچاتھا۔ 
یہ واقعہ اس وقت پیش آیا جب ہربھجن سمیت کئی کرکٹرز مولانا طارق جمیل کی زیر قیادت دعائیہ نشستوں میں شریک تھے۔ انضمام نے بتایا کہ سیشن دیکھنے کے بعد ہربھجن نے مولانا طارق جمیل کی تعریف کرتے ہوئے ان کی تعلیمات پر عمل کرنے کی خواہش کا اظہار کیاتھا۔  
ہمارے پاس ایک کمرہ تھا جہاں نماز ادا کی جاتی تھی، مولانا طارق جمیل شام کو ہمارے پاس تشریف لاتے اور نماز پڑھاتے تھے۔ کچھ دنوں کے بعد عرفان پٹھان، محمد کیف اور ظہیر خان بھی آنے لگے جبکہ ان کے علاوہ 4 دیگر ہندوستانی کرکٹرز بیٹھ کر ہمیں دیکھتے تھے۔  
انہوں نے کہا کہ ہربھجن سنگھ کو طارق جمیل کے مولانا ہونے کا علم نہیں تھا، اس نے کہا کہ میں اس شخص سے متاثر ہوں اور ان کی باتوں پر عمل کرنا چاہتا ہوں۔،، 
سماجی رابطے کی ویب سائٹ ٹوئٹر(ایکس) پر سابق بھارتی اسپنر ہربھجن سنگھ نے سابق کپتان انضمام الحق کی ایک ویڈیو شیئر کی جس پر انہوں نے شدید ناراضی کا اظہار کرتے ہوئے لکھا کہ میرے اسلام قبول کرنے پر غور کا دعویٰ جھوٹا ہے، مجھے سکھ ہونے پر فخر ہے۔،،