چیئرمین پی سی بی ذکا اشرف نے مصباح الحق کو ’’فری ہینڈ‘‘ دے دیا

پاکستان کرکٹ بورڈ (پی سی بی) نے کرکٹ کمیٹی کو بااختیار بنانے کے لیے نئی مینجمنٹ کمیٹی کے سربراہ ذکا اشرف کے مشیر مصباح الحق کو فری ہینڈ دے دیا۔ 
میڈیا رپورٹس کے مطابق چیئرمین پی سی بی ذکا اشرف کی جانب سے مصباح الحق کو پیغام بھیجا گیا ہے کہ کرکٹ کمیٹی کو مضبوط اور بااختیار بنائیں جبکہ اپنے ساتھ کرکٹرز کو ساتھ ملائیں اور معاملات کو دیکھیں۔ 
دوسری جانب سابق کرکٹر مصباح الحق بورڈ کی اعلیٰ عہدیداران سے ملاقاتوں کا سلسلہ جاری ہے جبکہ کرکٹ کمیٹی کے لیے سینئر سابق کرکٹرز کے نام کل تک فائنل ہونے کا قوی امکان ہے۔ 
رپورٹس میں دعویٰ کیا گیا ہے کہ کرکٹ کمیٹی پاکستان کرکٹ ٹیم کے ہیڈ کوچ کے معاملے پر بھی تجاویز دے گی، ٹیم ڈائریکٹر مکی آرتھر اور ہیڈ کوچ گرانٹ بریڈ برن کا اپنے عہدوں پر برقرار رہنا بھی مشکل دکھائی دے رہا ہے۔ 
ورلڈکپ سے قبل پاکستان کرکٹ بورڈ قومی ٹیم کے نئے ہیڈکوچ کیلئے نیا نام تلاش کرنے پر بھی غور کررہا ہے۔
ذرائع کے مطابق مصباح، جنہیں حال ہی میں چیئرمین پی سی بی مینجمنٹ کمیٹی ذکا اشرف کا مشیر مقرر کیا گیا ہے، نے احتیاط سے سابق کرکٹرز کی ایک فہرست منتخب کی ہے، جن میں مشتاق احمد، محمد وسیم، انضمام الحق اور اظہر علی شامل ہیں، جن پر چیف سلیکٹر کے کردار کے لیےغور کیا جائے گا۔