پی ایس ایل کی تاریخ میں پہلی بار ویمن بولنگ کوچ

پی ایس ایل کی تاریخ میں پہلی بار مردوں کی ٹیم کیلئے خاتون فاسٹ بولنگ کوچ کا تقرر کردیا گیا۔ 
ملتان سلطانز کے مطابق آئرلینڈ سے تعلق رکھنے والی 30 سالہ کیتھرین ڈالٹن کو ملتان سلطانز کا فاسٹ بولنگ کوچ مقرر کیا گیا ہے۔ کیتھرین ڈالٹن انگلش کرکٹ بورڈ سے ایڈوانس لیول تھری سرٹیفائیڈ کوچ ہیں۔ انہوں نے آئرلینڈ کی قومی ویمن ٹیم کے لیے چار ون ڈے اور چار ٹی ٹوئنٹی میچز کھیل رکھے ہیں۔ 
کیتھرین برطانیہ اور بھارت میں کوچنگ کا تجربہ رکھتی ہیں اور اس سے قبل بھی وہ نوجوان پاکستانی فاسٹ بولرز کے ساتھ کام کر چکی ہیں جن میں محمد الیاس، سمین گل، ارشد اقبال اور انڈر 19 کے کھلاڑی شامل ہیں۔  
کیتھرین ڈالٹن کے کوچنگ کیریئر میں فاسٹ بولنگ اکیڈمی یو کے اور بھارت میں الٹیمیٹ پیس فاؤنڈیشن کے ساتھ اسسٹنٹ ہیڈ کوچ کے طور پر خدمات انجام دینا شامل ہے۔ 
کیتھرین ڈالٹن نے ای ایس پی این کرک انفو کو بتایا کہ وہ پی ایس ایل فرنچائز میں شمولیت پر بہت خوش ہیں۔ خاتون کوچ کے طور پر مردوں کی ایک بڑی ٹی ٹوئنٹی فرنچائز میں کام کرنا میرے لیے اعزاز کی بات ہے۔،،
دوسری جانب دی ٹیلی گراف کا کہنا ہے کہ انگلینڈ کی سابق اسپنر الیکس ہارٹلی کو بھی ملتان سلطانز کے لیے اسپیشل اسپن باؤلنگ کوچ مقرر کیا جائے گا۔ 30 سالہ کھلاڑی اگست میں پیشہ ورانہ کرکٹ سے ریٹائر ہوئی تھیں، انہوں نے 2016 سے 2019 تک انگلینڈ کے لیے 28 ون ڈے اور چار ٹی ٹوئنٹی میچز کھیلے۔
الیکس ہارٹلی کے پاس لیول 2 کی کوچنگ کی اہلیت ہے اور ان کے پاس لنکاشائر کی ایج گروپ لڑکیوں کی ٹیموں کی کوچنگ کا بھی تجربہ ہے۔