ہفتہ کو کراچی میں اختتام پذیر ہونے والے چار روزہ تربیتی کیمپ کے بعد گرین شرٹس کے پلیئنگ اسکواڈ کو حتمی شکل دی گئی۔
٠١ جولائی ٢٠٢٤
ویمنزٹی ٹوئنٹی ایشیا کپ کرکٹ ٹورنامنٹ کے لیے پی سی بی کی جانب سے 15 رکنی پاکستان ویمنزٹیم کا باضابطہ اعلان کردیا گیا، ندا ڈار کوکپتان برقرار رکھا گیا ہے۔ ہفتہ کو کراچی میں اختتام پذیر ہونے والے چار روزہ تربیتی کیمپ کے بعد گرین شرٹس کے پلیئنگ اسکواڈ کو حتمی شکل دی گئی۔
تفصیلات کے مطابق گرین شرٹس کی تشکیل دی گئی 15رکنی قومی ویمن ٹیم ندا ڈار( کپتان)، عالیہ ریاض، ڈیانا بیگ، فاطمہ ثنا، گل فیروزہ، ارم جاوید، منیبہ علی، ناجیہ علوی، نشرہ سندھو، عمائمہ سہیل، سعدیہ اقبال، سدررا امین، سیدہ عروب شاہ، تسمیہ وہاب اور طوبہ حسن پر مشتمل ہے۔
محمد وسیم ٹیم کے ہیڈ کوچ جبکہ سابق ٹیسٹ بولرز عبدالرحمن اور جنید خان بالترتیب اسپن بولنگ کوچ اور اسسٹنٹ کوچ کے فرائض سرانجام دیں گے جبکہ،حنا منور منیجر، حنیف ملک فیلڈنگ کوچ ، رابعہ صدیق فزیو اور ولید احمد انالسٹ کی ذمہ داری ادا کریں گے۔
ایشیائی ممالک سے تعلق رکھنے والی8 ٹیموں کے ایونٹ کےگروپ اے میں شامل پاکستان ٹیم اپنا پہلا میچ 19جولائی کو روایتی حریف انڈیا کے خلاف کھیلے گی، نیپال اور متحدہ عرب امارات کے خلاف 21 اور 23جولائی کو میچز ہوں گے۔
قومی ویمنز ٹیم کے اعلان کے ساتھ ہی چار روزہ تربیتی کیمپ کا پہلا مرحلہ ختم ہوگیا،قومی ویمن سلیکشن کمیٹی کے ارکان سابق ٹیسٹ کرکٹر اسد شفیق اور بتول فاطمہ نے کیمپ میں کھلاڑیوں کی کارکردگی کا جائزہ لیا تھا،کیمپ کے پہلے مرحلے کے اختتام پر تمام کھلاڑی اپنے گھروں کو روانہ ہو گئیں۔
منتخب قومی ویمنز ٹیم کا تربیتی کیمپ کراچی میں 5 جولائی سے شروع ہوگا،عبوری ہیڈ کوچ محمد وسیم کی زیر نگرانی ایونٹ میں روانگی تک کھلاڑیوں کی صلاحیتوں کو جلا بخشنے کی کوشش کی جائے گی۔
قبل ازیں کیمپ میں طلب کردہ 28 کھلاڑیوں میں عالیہ ریاض، انوشے ناصر، عائشہ ظفر، ڈیانا بیگ، دعا ماجد، ایمان فاطمہ، فاطمہ ثنا، گل فیروزہ، حمنہ بلال، ارم جاوید، ماہم منظور، منیبہ علی، نجیہہ علوی، نشرہ سندھو، نتالیہ پرویز، ندا ڈار، عمیمہ سہیل، قرۃ العین، رامین شمیم، صدف شمس، سعدیہ اقبال، سدرہ امین، سیدہ عروب شاہ، تسمیہ رباب، طوبیٰ حسن، ُیسریٰ عامر، ام ہانی اور وحیدہ اختر شامل تھیں۔
واضح رہے کہ ویمنز ایشیا کپ19 سے28 جولائی تک سری لنکا کے شہر دمبولہ میں کھیلا جائے گا۔
