ورلڈکپ: پاکستانی ٹیم کو وائرل بخار نے لپیٹ میں لے لیا

بھارت میں موجود پاکستانی ٹیم کو وائرل بخار نے لپیٹ میں لے لیا، طبی امداد اور دیکھ بھال سے کئی کرکٹرزصحتیاب ہوگئے جبکہ بعض اب بھی بحالی صحت کے لیے کوشاں ہیں۔ 
بھارت سے بدترین شکست کے بعد گرین شرٹس کو پلیئرز کی صحت پر بھی تشویش لاحق ہوگئی ہے، کئی کرکٹرز وائرل بخار کا شکار رہے، البتہ بورڈ نے یہ بات میڈیا سے چھپائے رکھی۔ 
گزشتہ روز پہلے اعلان ہوا کہ ٹریننگ سیشن منسوخ کر دیا گیا ہے، جب میڈیا میں فٹنس مسائل پر چہ مگوئیاں ہونے لگیں تو پی سی بی نے نوٹ جاری کیا کہ ٹیم کے کئی کرکٹرز گذشتہ کچھ روز بخار میں مبتلا رہے تاہم ان میں سے بیشتر اب صحتیاب ہو چکے ہیں، دیگر بدستور میڈیکل پینل کی زیرنگرانی ہیں اور بحالی صحت کا عمل مکمل کریں گے۔ 
ذرائع کے مطابق شاہین آفریدی اور اسامہ میر کو بھی بخار تھا تاہم دونوں کی طبیعت اب بہتر ہے، پروٹوکول کے تحت بخار کی علامات پر پلیئرز کے کووڈ اور ڈینگی ٹیسٹ بھی ہوئے تھے۔ 
دریں اثنا گذشتہ شام 6 سے رات 8بجے تک ٹیم کا پریکٹس سیشن ہوا، اس میں 12 کھلاڑی شریک ہوئے جبکہ عبد اللہ شفیق، شاہین آفریدی ،محمد رضوان، سلمان علی آغا، محمد حارث اور زمان خان نے ہوٹل میں ہی آرام کیا، کپتان بابر اعظم سمیت دیگر پلیئرز نے بھرپور نیٹ پریکٹس کی، ٹیم کے کوچز کھلاڑیوں کی خامیاں دور کراتے نظر آئے، بیٹنگ اور بولنگ کے ساتھ فیلڈنگ پر بھی خصوصی توجہ دی گئی۔ 
واضح رہے کہ پاکستانی ٹیم ورلڈ کپ میں اپنا چوتھا میچ آسٹریلیا کے خلاف 20 اکتوبر کو بنگلورو میں کھیلے گی، سیمی فائنل کی دوڑ میں شامل رہنے کے لیے گرین شرٹس کو اب غلطیوں سے گریز کرتے ہوئے تسلسل سے عمدہ کھیل پیش کرنا ہوگا۔