ماضی میں، پی سی بی کے کچھ عہدیداروں کو بغیر کسی معقول وجوہات کے مختلف شہروں یا حتیٰ کہ بین الاقوامی مقامات کا دورہ کرتے ہوئے دیکھا گیا، جس کی وجہ سے بورڈ کو کافی مالی بوجھ کا سامنا کرنا پڑا۔
٢٣ مئی ٢٠٢٤
پاکستان کرکٹ بورڈ (پی سی بی) کے آفیشلز کے غیرضروری دوروں پر پابندی عائد کردی گئی۔ جبکہ پی ایس ایل فرنچائزز بورڈ سے خفا نظر آنے لگیں۔
تفصیلات کے مطابق پی سی بی آفیشلز اب مفت کے غیرضروری دورے نہیں کر سکیں گے، چیئرمین محسن نقوی نے اس پر پابندی لگا دی ہے، اس پابندی کا اطلاق اندرون اور بیرون ملک دونوں پر ہوگا، اس سے قبل بعض آفیشلز ضرورت نہ ہونے پر بھی اکثر لاہور سے دیگر شہروں یا ملک سے باہر بھی چلے جایا کرتے تھے۔ ان کے سفر اور قیام پر بورڈ کی بھاری رقم خرچ ہوتی تھی اس کے ساتھ الاؤنسز کی مد میں بھی خسارہ برداشت کرنا پڑتاتھا۔
ذرائع کے مطابق بعض آفیشلز نے یہ وطیرہ بنایا ہوا تھا کہ اکثر کوئی بہانہ بنا کر ٹور کرلیتے، ٹیم کی کوئی سیریز بھی ہونے کے وقت ایسا کیا جاتا، معاملہ جب چیئرمین کے نوٹس میں آیا تو انھوں نے ایکشن لیا، اس سے ورلڈکپ 2024 کی آڑ میں امریکا کی سیر کے خواب دیکھنے والے بعض آفیشلز کے ارمانوں پر بھی پانی پڑگیا ہے۔
دوسری جانب ذرائع نے مزید بتایا کہ پی سی بی میں تبدیلیوں کا عمل ابھی ختم نہیں ہوا بلکہ جلد دوبارہ آغاز ہوجائے گا، چیئرمین کو اب بیشتر ٹاپ آفیشلز کے کام کا اندازہ ہو چکا ہے اور وہ اہلیت کے مطابق ہی تقرریاں کرنا چاہتے ہیں۔
بعض ایسے آفیشلز بھی سامنے آئے جو زیادہ کام نہیں کرتے لیکن ظاہر ایسا کیا جاتا ہے جیسے ان کے بل بوتے پر ہی بورڈ چل رہا ہے، ایسے افراد کو گھر بھیجنے کی تیاری شروع ہو چکی ہے، ایک ڈائریکٹر ازخود 2 ماہ کی چھٹیوں پر امریکا جانے والے ہیں،ان کے حوالے سے پی ایس ایل فرنچائزز نے بھی پی سی بی سے شکایات کی ہیں۔ امید ہے کہ چیئرمین پی سی بی جلد اس معاملے کو بھی خود دیکھیں گے۔
