پی ایس ایل کمشنر نائلہ بھٹی نے اپنے عہدے سے استعفیٰ دے دیا

پاکستان سپر لیگ (پی ایس ایل) کی کمشنر نائلہ بھٹی نے اپنا استعفیٰ پاکستان کرکٹ بورڈ (پی سی بی) کو بھجوا دیا ہے۔ نئی انتظامیہ کے چارج سنبھالنے کے بعد سے ان کی پوزیشن غیر یقینی تھی۔ 
تفصیلات کے مطابق پی ایس ایل کے ورکنگ گروپ کا اہم اجلاس رواں ہفتے لاہور میں بلایا جانا تھا جس میں اہم امور پر غور کیے جانے کی توقع تھی، جس کے بعد چیئرمین پی سی بی محسن نقوی کی سربراہی میں گورننگ کونسل کے اجلاس میں فیصلے کیے گئے تاہم، یہ ملاقات ہوگی یا نہیں، یہ امر ابھی تک غیر یقینی ہے۔ 
نائلہ بھٹی، جن کے پی سی بی کے سابق چیئرمین نجم سیٹھی سے قریبی تعلقات تھے، ذکا اشرف کے دور میں کم اثر و رسوخ کے باوجود اپنے عہدے پر قائم رہیں۔ تاہم، محسن نقوی کی زیرقیادت انتظامیہ کی آمد کے ساتھ ہی صورتحال ان کے لیے ناقابل برداشت ہوتی گئی۔
نائلہ بھٹی کی بورڈ سے رخصتی کو پی ایس ایل فرنچائزز کے لیے ایک اہم دھچکا سمجھا جارہا ہے، جو پہلے ہی معاملات میں سست رفتاری سے غیر مطمئن ہیں۔
ذرائع کا کہنا ہے کہ آنے والے دنوں میں پاکستان کرکٹ بورڈ میں مزید تبدیلیاں متوقع ہیں۔