پاکستان سے مقابلہ ہمیشہ ہی ایک بڑا چیلنج ہوتا ہے، فتح کے لیے غیر معمولی کارکردگی دکھانی ہوگی، روہت شرما
بھارتی ٹیم کے کپتان روہت شرما کو پاکستان سے میچ کی فکر ستانے لگی۔
ایشیا کپ کا آغاز 30اگست کو ملتان میں میزبان گرین شرٹس اور نیپال کے درمیان میچ سے ہوگا،پاکستان اور بھارت کی ٹیمیں 2 ستمبر کو کینڈی میں مدِمقابل ہوں گی، اس ہائی وولٹیج مقابلے کے حوالے سے ابھی سے خاصا جوش وخروش پایا جاتا ہے، گذشتہ چند میگا ایونٹس میں گرین شرٹس نے روایتی حریف بھارت سے ہارنے کی روایت توڑی ہے۔
ایک انٹرویو میں بھارتی ٹیم کے کپتان روہت شرما نے بھی پاکستان سے میچ کو سخت امتحان قرار دیتے ہوئے کہا کہ روایتی حریف سے مقابلہ ہمیشہ ہی ایک بڑا چیلنج ہوتا ہے،گرین شرٹس کو مات دینے کے لیے ٹیم کو غیر معمولی کارکردگی دکھانا پڑے گی،ہماری کوشش ہوگی کہ بڑے میچ کا اضافی دباؤ نہ لیتے ہوئے اپنے گیم پلان کے مطابق صلاحیتوں کا اظہار کرتے ہوئے کامیابی حاصل کریں۔
انھوں نے کہا کہ سری لنکن کنڈیشنز میں ایشیا کپ کےمیچز سے ٹیموں کو ورلڈکپ کی اچھی تیاری اور کمبی نیشن کو حتمی شکل دینے میں بھی مدد ملے گی، بھارتی ٹیم بھی اس موقع سے فائدہ اٹھاتے ہوئے اپنی پلاننگ میں بہتری لانے کی کوشش کرے گی۔
یاد رہے کہ میگا ایونٹ کی تیاری کے لیے ہی اس بار ایشیا کپ کا فارمیٹ 50اوورز کا رکھا گیا ہے،ایونٹ میں شریک6ٹیموں کو 2گروپس میں تقسیم کیا گیا ہے، ’’اے‘‘ گروپ میں پاکستان، بھارت اور نیپال جبکہ گروپ ’’بی‘‘ گروپ میں سری لنکا، بنگلہ دیش اور افغانستان شامل ہیں،اگر روایتی حریف ٹیموں نے فائنل میں بھی جگہ بنائی تو ایشیا کپ میں ان کا آپس میں تین بار مقابلہ ہوگا۔