بھارتی ٹیم کا سری لنکا کا دورہ 26 جولائی سے شروع ہوگا

بھارتی ٹیم کے دورہ سری لنکا کا آغاز ٹی20 سیریز سے ہوگا جبکہ ون ڈے سیریز کا آغاز یکم اگست سے ہوگا۔ ہندوستان کو سری لنکا کے دورے پر 3 ٹی 20 ور 3 ون ڈے میچوں کی سیریز کھیلنی ہے۔ 
تفصیلات کے مطابق بھارت اور سری لنکا کے درمیان رواں ماہ کے آخر میں ہونے والی ٹی20 اور ون ڈے سیریز کے شیڈول کا اعلان کر دیا گیا ہے۔ دورہ سری لنکا کا آغاز ٹی20 سیریز سے ہوگا جبکہ ون ڈے سیریز کا آغاز یکم اگست سے ہوگا۔ ٹیم انڈیا کو سری لنکا کے دورے پر 3 ٹی20 ور 3 ون ڈے میچوں کی سیریز کھیلنی ہے۔  
بھارتی ٹیم، سری لنکا کے خلاف 26 اور 27 جولائی کو لگاتار دو دن ٹی20 میچز کھیلے گی جبکہ اس سیریز کا آخری میچ 29 جولائی کو کھیلا جائے گا۔
اس کے بعد ون ڈے سیریز کا پہلا میچ یکم اگست کو ہوگا جبکہ دیگر دو میچز 4 اور 7 اگست کو کھیلے جائیں گے۔ ٹی20 سیریز کے تینوں میچ پالے کیلے میں کھیلے جائیں گے اور تینوں ون ڈے میچز کولمبو میں کھیلے جائیں گے۔ 
گوتم گمبھیر کا بطور ہندوستانی کوچ یہ پہلا دورہ ہوگا۔ منگل کی شام ہندوستانی ٹیم کے نئے ہیڈ کوچ کے عہدے کے لیے گمبھیر کے نام کا اعلان کیا گیا تھا۔ راہل ڈریوڈ کی میعاد ختم ہونے کے بعد سے ہی گمبھیر کا نام اگلے ہیڈ کوچ کی دوڑ میں سب سے آگے تھا۔ گمبھیر کو بین الاقوامی سطح پر کوچنگ کا تجربہ نہیں ہے، لیکن آئی پی ایل میں ان کی رہنمائی کے تحت، لکھنؤ سپر جائنٹس نے لگاتار دو بار سیمی فائنل میں جگہ بنائی جبکہ کولکاتا نائٹ رائیڈرز نے گزشتہ سیزن میں اپنی آئی پی ایل کی تاریخ میں تیسری بار ٹرافی جیتی۔ 
بھارت نے اس سے قبل جولائی 2021 میں محدود اوورز کی سیریز کے لیے سری لنکا کا دورہ کیا تھا۔ شیکھر دھون اس دورے پر ہندوستانی ٹیم کے کپتان تھے جبکہ راہل ڈریوڈ کوچ کے طور پر اس دورے پر ٹیم کے ساتھ گئے تھے۔ 
ٹی20 ورلڈ کپ کے بعد ہندوستانی ٹیم کا یہ دوسرا دورہ ہوگا۔ فی الحال، ٹیم انڈیا زمبابوے میں پانچ میچوں کی ٹی20 سیریز کھیل رہی ہے۔ سری لنکا کی ٹیم ٹی20 ورلڈ کپ 2024 میں لیگ مرحلے سے باہر ہو گئی تھی۔ فی الحال اس کے کھلاڑی لنکا پریمیئر لیگ میں اپنی صلاحیتوں کو آزما رہے ہیں۔