ورلڈکپ: چاہتا ہوں کہ افغانستان، پاکستان کو ہرادے، وریندرسہواگ

بھارتی ٹیم کے سابق بلے باز وریندر سہواگ ورلڈ کپ میچز میں پاکستان کی افغانستان کے ہاتھوں شکست کے خواہشمند ہوگئے۔ 
سابق بھارتی کرکٹر وریندر سہواگ نے اپنی ذاتی خواہش کا اظہار کرتے ہوئے کہا ہے کہ میں چاہتا ہوں افغانستان آئندہ آئی سی سی ورلڈ کپ 2023 میں پاکستان کو شکست دے دے۔ 
کرکٹ ویب سائٹ کے ساتھ ایک حالیہ انٹرویو میں وریندر سہواگ نے آئی سی سی ون ڈے ورلڈ کپ میں پاکستان کے خلاف بھارت کے ریکارڈ پر روشنی ڈالی اور اس امر پر زور دیا کہ یہ ریکارڈ برقرار رہے گا۔ 
انہوں نے کہا کہ احمد آباد میں بھارت اور پاکستان کے درمیان ہونے والے میچ میں تقریباً ایک لاکھ پُرجوش لوگوں کا نمایاں ہجوم دیکھنے کو ملے گا جس سے دونوں ٹیموں کے لیے دباؤ سے بھرپور ماحول پیدا ہوگا۔ 
وریندرسہواگ نے کہا کہ پاکستان کے خلاف بھارت کا گرائونڈ ریکارڈ انتہائی قابل ذکر ہے خاص طور پر ون ڈے ورلڈ کپ میں بھارت کو پاکستان پر سبقت حاصل رہی ہے۔ اب تک ہم ان کے خلاف ایک بھی میچ نہیں ہارے ہیں اور مجھے امید ہے کہ یہ زبردست ریکارڈ آئندہ بھی برقرار رہے گا۔ 
ان کا کہنا تھا کہ اگرچہ پاکستان کی ٹیم کافی مضبوط ہے لیکن ہم نے ان سے بہتر کارکردگی کا مظاہرہ کیا ہے اس ریکارڈ کو برقرار رکھنا پسند کروں گا، خاص طور پر جب بھارتی ٹیم احمد آباد میں پاکستان کے خلاف کھیلنے کے لیے میدان میں اترے گی تو مجھے امید ہے کہ ایک لاکھ سے زائد کرکٹ کے شائقین اور دیگر لوگ میچ دیکھنے کے لیے گراؤنڈ میں آئیں گے۔