پاکستان، نیوزی لینڈ سیریز: کپتان بابراعظم سے مشاورت مکمل

ذرائع کے مطابق نیشنل کرکٹ اکیڈمی میں رات گئے سلیکشن کمیٹی اور بابراعظم کے درمیان طویل نشت ہوئی جس میں ٹی20 اور ون ڈے سیریز کے لیے کھلاڑیوں کے ناموں پر تبادلہ خیال کیا گیا، اس ملاقات میں نیوزی لینڈ کی سیریز کے ساتھ ورلڈکپ کے ممکنہ کھلاڑیوں کے پول کے حوالے سے بھی ابتدئی بات چیت کی گئی۔

ایشیاکپ اور ورلڈکپ کے پیش نظر ون ڈے ٹیم میں اب مزید کوئی تجربات نہ کرنے پر اتفاق کیا گیا ہے، اس سلسلے میں سلیکشن کمیٹی ٹیم ڈائریکٹر اور کسنسلٹنٹ مکی آرتھر کی رائے بھی معلوم کرے گی۔

شارجہ میں افغانستان کے خلاف تین ٹی20 میچز کی سیریز میں بابراعظم کو سلیکشن کمیٹی نے ریسٹ دیاتھا تاہم اس سیریز میں وہ ایک بارپھر ایکشن میں ہوں گے۔ بابراعظم نے نیوزی لینڈ کے خلاف بہترین اسکواڈ میدان میں اتارنے کی خواہش کا اظہار کیا ہے۔

 کپتان کی رائے کے مطابق سلیکشن کمیٹی نے ایک ایسا کمبینیشن تیار کررہی ہے جس میں نوجوان اور سینئرز کھلاڑی شامل ہوں، گزشتہ سریز کے نظر انداز اور پی ایس ایل میں سب سے زیادہ شکار کرنے والے فاسٹ بولر عباس آفریدی کو بھی موقع دیاجاسکتا ہے۔

واضح رہے کہ نیوزی لینڈ کے خلاف سیریز کے لیے منتخب کردہ کھلاڑی 7 اپریل کو لاہور میں کیمپ کے لیے رپورٹ کریں گے۔