ویڈیو میں دیکھا جاسکتا ہے کہ نسیم شاہ کی گیند پر شاداب خان نے ڈائیو لگا کر شاندار کیچ پکڑا اور افغانستان کے کپتان حشمت اللہ شاہدی کو بغیر کوئی رن بنائے پویلین روانہ کیا۔
٢٣ اگست ٢٠٢٣
قومی ٹیم کے نائب کپتان اور آل راؤنڈر شاداب خان نے افغانستان کے خلاف پہلے ون ڈے میچ میں شاندار کیچ پکڑکر شائقین کرکٹ کی توجہ سمیٹ لی۔
سری لنکا کے شہر ہمبنٹوٹا میں کھیلے گئے پہلے ون ڈے میچ میں پاکستان کی جانب سے دیے گئے 202 رنز ہدف کے تعاقب میں افغانستان کی ٹیم 19.2 اوورز میں فقط 59 رنز پر ڈھیر ہوگئی۔
افغانستان کے 9 بلے باز ڈبل فگر میں بھی داخل نہ ہوسکے، رحمان اللہ گرباز 18 اور عظمت اللہ عمر زئی 16 رنز بناسکے۔
حارث رؤف نے شاندار بولنگ کا مطاہرہ کرتے ہوئے پانچ کھلاڑیوں کو پویلین کی راہ دکھائی، شاہین آفریدی نے دو وکٹیں حاصل کیں جبکہ نسیم شاہ اور شاداب خان ایک، ایک وکٹ حاصل کرسکے۔
میچ میں قومی ٹیم کی فیلڈنگ بھی لاجواب رہی اور آل راؤنڈر شاداب خان کے سپرمین کے انداز میں پکڑے جانے والے حیرت انگیز کیچ نے دنیائے کرکٹ کی توجہ سمیٹ لی، جس کی ویڈیو سوشل میڈیا پر وائرل ہورہی ہے۔
اس ویڈیو میں دیکھا جاسکتا ہے کہ نسیم شاہ کی گیند پر شاداب خان نے ڈائیو لگا کر شاندار کیچ پکڑا اور افغانستان کے کپتان حشمت اللہ شاہدی کو بغیر کوئی رن بنائے پویلین روانہ کیا۔
کمنٹیٹرز کی جانب سے بھی شاداب خان کے کیچ کی تعریف کی گئی اور دیگرکرکٹ شائقین بھی ان کے کیچ کو لاجواب قرار دے رہے ہیں۔
واضح رہے کہ شاداب خان نے بیٹنگ کرتے ہوئے 39 رنز کی ذمہ دارانہ اننگز بھی کھیلی اور ایک وکٹ بھی حاصل کی جبکہ حارث رؤف کو 5 وکٹیں حاصل کرنے پر میچ کا بہترین کھلاڑی قراردیا گیا۔
.jpg)
