شاہد آفریدی کا گوتم گمبھیر کی بطور ہیڈ کوچ تقرری پر ردعمل

گوتم گمبھیر کے بھارتی کرکٹ ٹیم کا ہیڈ کوچ مقرر ہونے پر پاکستان کے سابق اسٹار آل راؤنڈر شاہد آفریدی کا ردعمل سامنے آگیا۔ 
گزشتہ روز بھارتی کرکٹ بورڈ کےسیکریٹری جنرل جے شاہ نے گوتم گمبھیر کو ٹیم کا ہیڈ کوچ تعینات کرنے کا اعلان کیا تھا۔ 
پاکستان کے سابق کپتان شاہد آفریدی نے اپنے پرانے حریف گوتم گمبھیر کے بھارتی ٹیم کا نیا ہیڈ کوچ بننے پر ردعمل کا اظہار کرتے ہوئے کہا کہ گوتم گمبھیر مثبت اور سیدھی بات کرتے ہیں۔،، 
شاہد آفریدی نے کہا کہ گوتم گمبھیر کو ایک بڑا موقع ملا ہے اور یہ ان پر منحصر ہوگا کہ وہ کیسے اس کا بہترین استعمال کرتے ہیں۔،، 
دوسری جانب جنوبی افریقہ کے سابق فاسٹ بولر ڈیل اسٹین نے بھی گوتم گمبھیر کی بطور بھارتی ہیڈ کوچ تقرری پر کہا کہ وہ سابق بلے باز کے بہت بڑے مداح ہیں۔،، 
ڈیل اسٹین نے کہا کہ مجھے گمبھیر کا میدان پر سخت لیکن میدان سے باہر شریف آدمی کا انداز پسند ہے۔ وہ ایک بہت ہی ہوشیار کرکٹر ہے جو بطور کوچ بھارتی ٹیم کے لیے لاجواب ثابت ہوگا۔،، 
واضح رہے کہ گوتم گمبھیر نے ون ڈے ورلڈ کپ 2011 کے فائنل میں سری لنکا کے خلاف 97 رنز بناکر بھارت کو 28 سال بعد ٹائٹل جتوانے میں اہم کردار ادا کیا تھا۔ 
گوتم گمبھیر نے 2003 میں اپنے ون ڈے ڈیبیو کے بعد سے بھارت کے لیے اپنے 13 سالہ طویل بین الاقوامی کیریئر کے دوران 10,000 سے زیادہ رنز بنائے۔
گوتم گمبھیر کی پہلی ذمہ داری اس ماہ کے آخر میں سری لنکا کا وائٹ بال ٹور ہوگی جس میں تین ون ڈے اور تین ٹی ٹوئنٹی شامل ہیں۔
گوتم گمبھیر باضابطہ طور پر رواں ماہِ جولائی سے اپنے عہدے پر کام کا آغاز کریں گے اور 31 دسمبر 2027 تک خدمات انجام دیں گے۔ اگرچہ گوتم گمبھیر نے باضابطہ طور پر کبھی کسی ٹیم کی کوچنگ نہیں کی لیکن وہ آئی پی ایل فرنچائزز لکھنؤ سپر جائنٹس اور کولکتہ نائٹ رائیڈرز کے ساتھ بطور مینٹور منسلک رہ چکے ہیں۔ 
میڈیا رپورٹس کے مطابق گوتم گمبھیر بھارتی ٹیم کے ہیڈ کوچ کے طور پر بارہ کروڑ روپے سالانہ معاوضہ لیں گے۔