news
English

ورلڈکپ: آسٹریلیا کیخلاف میچ سے قبل پاکستان کو بڑا دھچکا

عبداللہ شفیق بخار میں مبتلا، کئی پاکستانی کھلاڑیوں نے پریکٹس سیشن میں بھی حصہ نہیں لیا۔

ورلڈکپ: آسٹریلیا کیخلاف میچ سے قبل پاکستان کو بڑا دھچکا

ورلڈکپ کے اہم مقابلے میں آسٹریلیا کیخلاف میچ سے قبل پاکستانی اسکواڈ کو بڑا دھچکا لگ گیا۔ کئی کھلاڑیوں کے بخار اور وائرل انفیکشن میں مبتلا ہونے کی اطلاعات ہیں جس کے بعد پاکستانی اوپنر عبداللہ شفیق کو وائرل بخار میں مبتلا ہونے کے باعث غیرضروری ملاقاتوں سے روک دیا گیا ہے جبکہ کئی پاکستانی کھلاڑیوں نے پریکٹس سیشن میں بھی حصہ نہیں لیا۔
رپورٹس کے مطابق قومی ٹیم کے اوپنر عبداللہ شفیق اس وقت بخار اور فلو کی علامات سے دوچار ہیں اور بیماری کے ممکنہ پھیلاؤ کو روکنے کیلئے احتیاطی تدابیر اختیار کررہے ہیں۔
دوسری جانب
 20 اکتوبر کو آسٹریلیا کے خلاف میچ کی تیاری کیلئے قومی ٹیم نے گزشتہ روز پریکٹس سیشن میں حصہ لیا تاہم اس موقع پر بھی اوپنر نے پاکستانی ٹیم کو جوائن نہیں کیا۔ 
عبداللہ شفیق کے علاوہ محمد رضوان، شاہین آفریدی، سلمان علی آغا، زمان خان اور محمد حارث نے بھی ٹریننگ نہیں کی۔ 
قبل ازیں فاسٹ بولر شاہین آفریدی اور اسامہ میر کو بھی بخار کی علامات کا سامنا تھا تاہم وہ اب صحتیاب ہوچکے ہیں۔ 
یاد رہے کہ گزشتہ روز پاکستانی ٹیم نے ٹریننگ کے حوالے سے اپنا پلان تبدیل کردیا تھا، پہلے ٹریننگ نہ کرنے کا فیصلہ کیا تھا بعدازاں فٹنس مسائل کے حوالے سے خبریں گردش کرنے لگیں تو بورڈ نے بتایا کہ کھلاڑی وائرل بخار میں مبتلا ہیں۔ 
واضح رہے کہ قومی ٹیم نے ایونٹ میں اب تک 3 میچز کھیل رکھے ہیں جس میں 2 فتوحات حاصل ہوئی ہیں جبکہ ایک میچ میں رواتیی حریف کے ہاتھوں شکست کا منہ دیکھنا پڑا۔