ویمنز ایشیا کپ 2024 کی دو سیمی فائنلسٹ ٹیموں کی تصدیق ہو گئی

ویمنز ٹی 20 ایشیا کپ کی تاریخ میں پاکستان ٹیم تاریخ رقم کرتے ہوئے 10 وکٹوں سے میچ جیتنے والی پہلی ٹیم بن گئی۔ پاکستانی ٹیم دوسرا سیمی فائنل 26 جولائی کو دمبولا میں کھیلے گا جبکہ بھارت اسی تاریخ کو پہلے سیمی فائنل میں اسی مقام پر مدمقابل ہو گا۔ 
تفصیلات کے مطابق منگل کو رنگیری دمبولا انٹرنیشنل اسٹیڈیم میں کھیلے گئے میچ میں پاکستان نے یو اے ای کو 10 وکٹوں سے شکست دیکر نیا ریکارڈ بنا ڈالا۔ 
پاکستان نے یو اے ای کیخلاف ٹاس جیت کر پہلے فیلڈنگ کا فیصلہ کیا تھا۔ یو اے ای نے مقررہ 20 اوورز میں 8 وکٹوں کے نقصان پر 103 رنز بنائے اور پاکستان کو جیت کیلئے 104 رنز کا ہدف دیا۔ 
ہدف کے تعاقب میں پاکستان کی اوپننگ جوڑی گل فیروزہ اور منیبہ علی نے شاندار بلے بازی کا مظاہرہ کرتے ہوئے صرف 14.1 اوورز میں ہی ہدف حاصل کرلیا۔ 
گل فیروزہ نے 62 رنز بنائے جبکہ منیبہ علی 37 رنز کے ساتھ ناقابل شکست رہیں۔ پاکستان کی جانب سے سعدیہ اقبال، نشرہ سندھو اور طوبیٰ حسن نے دو دو جبکہ کپتان ندا ڈار نے ایک وکٹ حاصل کی۔ 
متحدہ عرب امارات کی جانب سے صرف 3 پلیئرز ڈبل فگر میں داخل ہوسکیں، تیرتھا ستیش 40 رنز بنا کر نمایاں رہیں، کپتان ایشا اوز نے 16 اور خوشی شرما نے 12 رنز بنائے۔ 
پاکستان ویمنز ٹیم ایشیا کپ کی تاریخ میں 10 وکٹوں سے میچ جیتنے والی پہلی ٹیم بن گئی ہے جبکہ مجموعی طور پر پاکستان کی یہ دوسری 10 وکٹوں کی فتح ہے، اس سے قبل پاکستان نے 11 سال قبل آئرلینڈ کو 10 وکٹوں سے شکست دی تھی۔ 
واضح رہے کہ سری لنکا میں جاری ویمنز ٹی20 ایشیا کپ میں قومی ٹیم بھارت کے خلاف اپنا پہلا میچ ہار گئی تھی، تاہم گرین شرٹس نے دوسرے میچ میں نیپال کو شکست دی تھی۔