گلوبل ٹی 20 لیگ میں عمر اکمل کو کرپشن کی پیشکش کا انکشاف

گلوبل ٹی 20 کینیڈا لیگ میں پاکستانی کھلاڑی عمر اکمل کو کرپشن کی پیشکش کیے جانے کا انکشاف ہوا ہے۔

کینیڈا میں کھیلے جانے والی گلوبل ٹی 20 لیگ میں پاکستانی کھلاڑی عمر اکمل کو کرپشن کی پیشکش کیے جانے کا انکشاف ہوا ہے تاہم عمر اکمل آئی سی سی اینٹی کرپشن یونٹ کو پیشکش سے آگاہ کردیا ہے۔

ذرائع کے مطابق گلوبل لیگ سے وابستہ ایک سابق پاکستانی ٹیسٹ کرکٹر نے عمر اکمل کو پیشکش کی تھی جب کہ آئی سی سی نے پلیئرز کو پہلے ہی خبردار کر دیا تھا کہ ایک بھارتی بکی بھی لیگ میں سرگرم ہے، پاکستانی کرکٹر نے گلوبل ٹی 20 میں پیشکش سے منتظمین کو بھی آگاہ کر دیا ہے۔

دوسری جانب ترجمان پی سی بی کا کہنا ہے کہ گلوبل ٹی 20 لیگ سے پی سی بی کا براہ راست کوئی تعلق نہیں، کرکٹ بورڈ آئی سی سی کی منظوری کے بعد کرکٹرز کو این او سی دیتا ہے

واضح رہے کہ گلوبل ٹی 20 لیگ میں پاکستان کے 6 کھلاڑی شریک ہیں جن میں شاہد آفریدی، وہاب ریاض، شاداب خان، محمد نواز، شعیب ملک اور عمر اکمل شامل ہیں۔