یہ افسوسناک واقعہ امریکی میجر لیگ کرکٹ (ایم ایل سی) کے دوران سان فرانسسکو یونیکورنز اور سیائٹل اورکاس کے میچ میں پیش آیا۔
١٩ جولائی ٢٠٢٤
امریکا میں جاری میجر لیگ میچ کے دوران جنوبی افریقہ کا بولر سر پر گیند لگنے سے شدید زخمی ہوگیا۔ جس کی ویڈیو سوشل میڈیا پر وائرل ہوگئی۔
تفصیلات کے مطابق امریکا میں جاری میجر لیگ کرکٹ (ایم ایل سی) کےمیچ کے دوران سان فرانسسکو یونیکورنز کے جنوبی افریقی بولر کارمی لی روکس کی گیند پر انہی کے ہم وطن سیائٹل اورکاس کے بلے باز ریان رکلیٹن نے ایک زوردارشارٹ کھیلا جس کے باعث گیند سیدھی بولر کے سر پر جالگی اور خون بہنے لگا۔ بولر کو فوری طبی امداد فراہم کرنے کے لئے میدان سے باہر لے جایا گیا تاہم واقعے کے بعد بولر اپنے ہوش و حواس میں تھے جس کی وجہ سے سنجیدہ نوعیت کی انجری سے بچ گئے۔
دوسری جانب فاسٹ بولر کے سر پر گیند لگنے کی وجہ سے بقیہ میچز میں ان کی شرکت مشکوک ہے تاہم اس حوالے سے فرنچائز نے کوئی باضابطہ بیان جاری نہیں کیا۔
لی روکس کی جگہ اوور کی بقیہ گیندیں امریکی آل راؤنڈر کورے اینڈرسن نے کرائیں اور اوور مکمل کیا۔
واضح رہے کہ امریکی میجر لیگ کا آغاز 5 جولائی سے ہوا تھا جبکہ ایونٹ کا فائنل 28 جولائی کو کھیلا جائے گا۔ ایم ایل سی کی فرنچائزز میں کئی پاکستانی کھلاڑی بھی شامل ہیں۔
.jpg)
