ٹی20 ورلڈکپ 2024: ویسٹ انڈیز نے یوگنڈا کو میدان بدر کر ڈالا

ٹی ٹوئنٹی ورلڈ کپ 2024 میں ویسٹ انڈیز نے یوگنڈا کو 134 رنز کے بڑے مارجن سے شکست دے دی۔ 
ویسٹ انڈیز کے 173 رنز کے تعاقب میں یوگنڈا کی پوری ٹیم 12 اوورز میں 39 رنز بنا کر آؤٹ ہو گئی۔ ویسٹ انڈیز نے میچ 134 رنز کے بھاری مارجن سے جیت لیا۔ 
ویسٹ انڈٖیزکی جانب سے دیا گیا 174 رنزکے ہدف کا تعاقب یوگنڈا کے لیے بہت مشکل ثابت ہوا، ٹیل اینڈر جما میاگی واحد کھلاڑی تھے جنہوں نے 13 رنز بنائے ان کے علاوہ کوئی بیٹسمین ڈبل فیگر میں داخل نہ ہو سکا۔ 
رابنسن اوبویا نے 6، الپیش رامجانی نے 5 اور سائمن سیسازی نے 4 رنز بنائے۔ 
یوگنڈا کی بیٹنگ لائن تہس نہس کرنے میں ویسٹ انڈیز کے بولر عقیل حسین نے اہم کردار ادا کیا جنہوں نے 4 اوورز میں صرف گیارہ رنز دے کر 5 بلے بازوں کا شکار کیا۔ 
الزاری جوزف نے 2، روماریو شیفرڈ، آندرے رسل اور موتی نے 1،1 وکٹ حاصل کی۔ 
اس سے قبل پرویڈینس اسٹیڈیم گیانا میں ہونے والے میگا ایونٹ کے گروپ سی کے میچ میں ویسٹ انڈیز نے ٹاس جیت کر پہلے بیٹنگ کی اور مقررہ 20 اوورز میں 5 وکٹوں کے نقصان پر 173 رنز بنائے۔ 
ویسٹ انڈیز کے اوپنرز نے 41 رنز کی شراکت داری قائم کی، برینڈن کنگ 13 رنز بناکر آؤٹ ہوئے، جبکہ جانسن چارلس نمایاں بیٹسمین تھے جنہوں نے 44 رنز کی عمدہ اننگز کھیلی۔ نکولس پوران نے 22 اور کپتان رؤمن پاول نے 23 رنز بنائے، شیرفین ردرفورڈ 22 جبکہ آندرے رسل نے ناقابل شکست 30 رنز بنائے۔ 
یوگنڈا کے بولر برائن مسابا نے 2 کھلاڑیوں کو آؤٹ کیا، جبکہ رامجانی، کوسموس اور دنیش نے 1،1 وکٹ حاصل کی۔ 
ٹی 20 ورلڈ کپ کےگروپ سی میں ویسٹ انڈیز 2 فتوحات کے ساتھ دوسرے نمبر پر ہے جبکہ یوگنڈا 3 میچوں میں ایک فتح اور 2 شکستوں کے ساتھ تیسرے نمبر پر ہے۔ 
اسکواڈز: 
ویسٹ انڈیز: رؤمن پاول (کپتان)،برینڈن کنگ، جانسن چارلس، نکولس پوران (وکٹ کیپر)، روسٹن چیز، شیرفین ردرفورڈ، آندرے رسل، روماریو شیفرڈ، عقیل حسین، الزاری جوزف اور گُڈاکیش موتی۔ 
یوگنڈا: برائن مسابا (کپتان)، راجر موگاسا، سائمن سیسازی (وکٹ کیپر)، رابنسن اوبویا، ریاضت علی شاہ، الپیش رامجانی، دنیش ناکرانی، جما میاگی، کینتھ ویزوا،  کوسمس کیوٹا، فرینگ سوبوگا۔