کیا پی سی بی قومی کھلاڑیوں کے سینٹرل کنٹریکٹ پر نظرثانی کرے گا؟

میڈیا رپورٹس کے مطابق ٹی ٹوئنٹی ورلڈ کپ 2024 میں انتہائی خراب کارکردگی کا مظاہرہ کرنے کے بعد پی سی بی پاکستانی کھلاڑیوں کے سینٹرل کنٹریکٹ پر نظرثانی کرے گا۔ کئی بڑے ناموں کو ٹیم اور کنٹریکٹس سے ہاتھ دھونا پڑسکتا ہے۔ 
یہاں یہ بات یاد رکھنا اہم ہے کہ کھلاڑیوں نے ذکا اشرف کے دور میں گزشتہ سال یکم جولائی کو تین سالہ معاہدہ کیا تھا، جس میں تنخواہوں میں اضافہ اور آئی سی سی سے پی سی بی کوملنے والی آمدنی کا ایک مقررہ حصہ شامل تھا۔ 
تفصیلات کے مطابق ٹی20 ورلڈکپ 2024 کے پہلے راؤنڈ سے باہر ہونے والی پاکستانی ٹیم کے کھلاڑیوں پر پاکستان کرکٹ بورڈ نے بجلی گرانے کا فیصلہ کرلیا ہے۔ 
میڈیا رپورٹس کے مطابق ٹی20 ورلڈکپ میں ناقص کارکردگی کے بعد قومی ٹیم کے کھلاڑیوں کے سینٹرل کنٹریکٹ کا ازسر نو جائزہ لینے کا فیصلہ کیا گیا ہے۔
پرفارمنس نہ دینے والے کھلاڑیوں کی تنزلی ہوگی جبکہ کئی بڑے ناموں کو ڈراپ کرنے کے علاوہ سینٹرل کنٹریکٹ سے بھی ہاتھ دھونا پڑسکتا ہے، گزشتہ برس یکم جولائی سے 3 برس کا کنٹریکٹ دیا گیا تھا تاہم اب ٹی20 ورلڈکپ میں مایوس کن کارکردگی کی وجہ سے جائزہ لیا جائے گا۔  
قومی ٹیم اس عرصے میں ایشاکپ، بھارت میں ہونے والے 50 اوورز کے ورلڈکپ، دورہ آئرلینڈ، نیوزی لینڈ اور آسٹریلیا کیخلاف سیریز میں بری طرح ناکام رہی ہے۔
 واضح رہے کہ قومی کرکٹرز نے ذکا اشرف کے دور میں دباؤ ڈال کر اپنے معاوضوں میں اضافہ کروایا تھا۔ 
دوسری جانب چیئرمین پی سی بی محسن نقوی اور اعلی عہدیدار رات گئے دفاتر میں موجود رہے جہاں ٹیم کی بدترین کارکردگی اور سینٹرل کنٹریکٹ کے حوالے سے مشاورت کی گئی۔