بھارتی کرکٹر محمد کیف کا تمام فارمیٹس سے ریٹائرمنٹ کا اعلان

محمد کیف نے تقریباً 12 برس قبل ملک کیلیے آخری انٹرنیشنل میچ کھیلا تھا

PHOTO: AFP

سابق بھارتی بیٹسمین محمد کیف نے کھیل سے مکمل ریٹائرمنٹ لے لی، وہ اب تینوں فارمیٹس میں نہیں کھیلیں گے۔

محمد کیف نے تقریباً 12 برس قبل ملک کیلیے آخری انٹرنیشنل میچ کھیلا تھا، چھ برسوں پر محیط بین الاقوامی کیریئر میں کیف کی انگلینڈ کیخلاف 2002 کی نیٹ ویسٹ سیریز کے فائنل میں 87 کی فتح گر اننگز نمایاںتر ہے،37 سالہ بیٹسمین فیلڈنگ میں انتہائی متحرک ہونے کے ساتھ ساتھ مڈل آرڈر میں انتہائی کارآمد رہے، انھوں نے تمام فارمیٹ سے ریٹائرمنٹ کااعلان کرنے کیلیے 13 جولائی کا انتخاب کیا، اسی دن 16 برس قبل نیٹ ویسٹ ٹرافی کا فائنل منعقد ہوا تھا جس میں ان کی شاندار پرفارمنس کی بدولت بھارت نے ٹائٹل اپنے نام کیا تھا۔

کیف نے سوشل میڈیا اکاؤنٹ پر ویڈیو پیغام کے ذریعے اپنی ریٹائرمنٹ کا فیصلہ شائقین سے شیئر کیا، وہ حالیہ دنوں میں کرکٹ مبصر اور مشہور ہندی کمنٹیٹر بھی ہیں۔