کوئی ذمہ داری قبول کرنے کو تیار نہیں،وسیم نے استعفے کا سوال گول کردیا

چیف ایگزیکٹیو وسیم خان نے استعفے کا سوال گول کردیا

فوٹو: پی سی بی

پی ایس ایل میں بائیو سیکیورٹی کی ناکامی پر کوئی پی سی بی عہدیدار ذمہ داری قبول کرنے کو تیار نہیں، معاملہ گورننگ بورڈ کے کورٹ میں ڈال دیا۔

چیف ایگزیکٹیو وسیم خان نے استعفے کا سوال گول کردیا، پی ایس ایل ملتوی ہونے پر گذشتہ روز کراچی میں پریس کانفرنس کے دوران نمائندہ ’’ایکسپریس‘‘نے سوال کیاکہ کیا کوئی انتظامی غفلت کی ذمہ داری قبول کرتے ہوئے استعفٰی دے گا۔

جواب میں وسیم خان نے کہا کہ پوری تحقیقات کی جائیں گی کہ بائیو سیکور ببل میں کورونا کیسز کیسے آئے؟ یہ کرکٹ، فینز، بورڈ اور فرنچائز سب کا ہی نقصان ہے، معاملے کی تہہ تک جائیں گے، بورڈ آف گورنرز سے بات کرکے آزادانہ تحقیقات کرائی جائیں گی، کہاں اور کب کیا غلط ہوا؟یہ جاننا بہت ضروری ہے۔

انھوں نے کہا کہ ہم نے زمبابوے اور جنوبی افریقہ کیخلاف ہوم سیریز کامیابی سے کرائیں، ہمیں پی ایس ایل میں بھی بہتر انتظامات کرنا چاہیے تھے، اس بار سامنے آنے والے حالات سے سبق سیکھنا ہوگا۔